Ekspert: Ölkəmiz nə üçün Beynəlxalq İnformatika Olimpiadasında qızıl medal qazana bilmir?

29-06-2021 / 16:37
Xeberler.az olaraq məlumat vermişdik ki, 19-25 iyun 2021-ci il tarixlərində Sinqapurda 33-cü Beynəlxalq İnformatika Olimpiadası keçirilib.
 
90 ölkədən 351 şagirdin qatıldığı müsabiqədə məktəblilərimiz uğurla çıxış edərək 2 bürünc medal qazanıb.
 
Gəncə şəhər M.Əzizbəyov adına 15 nömrəli tam orta məktəbin 11-ci sinif şagirdi Əziz Hüseynov və Heydər Əliyev adına Müasir Təhsil Kompleksinin 10-cu sinif şagirdi Səid Nəsibov müsabiqənin bürünc medalına layiq görülüb.
 
Bununla bağlı Azərbaycan İnternet Formunun Prezidenti, ekspert Osman Gündüz münasibət bildirib:
 
"Xatırladıram ki, ötən il bu olimpiadada 3 bürünc medal qazanmışdıq. Dünyanın ən yaxşı 5 elm olimpiadasından biri olan bu olimpiadada 1994-cü ildən ölkəmiz iştirak etsə də indiyədək qızıl medal qaza bilməmişik, cəmi bir gümüş və 9 bürünc medal qazanılıb.
 
Ümumiyyətlə, bu olimpiada kifayət qədər rəqabətlidir. Medallara iİddiaçılar çox olur.
Son zamanlar Təhsil Nazirliyi bu olimpiadaya hazırlığa diqqəti xeyli artırıb, xeyli resurslar cəlb edib.
 
Beynəlxalq İnformatika Olimpiadalarına hazırlıq prosesi Azercell dövlət şirkətinin dəstəyi ilə həyata keçirilir".
 
Ekspertin sözlərinə görə, qonşu ölkələrlə müqayisədə Beynəlxalq İnformatika Olimpiadasından qazandığımız medallar hələlik xeyli azdır.
 
"Beləliklə, nəticələrin təhlili göstərir ki, ölkəmizdə İnformatikaya ayrılan resurslar və diqqət yetərli deyil.
 
İnformatikanın "evini yıxan" problem isə indiyədək də öz həllini tapa bilməyib.
Məlum olduğu kimi bizdə ali məktəbə daxil olarkən İT və Kompüter ixtisası seçənlər İnformatikadan deyil Kimyadan qəbul imtahanı verirlər. Odur ki bütün məktəblər və valideynlər, İT sahəsini seçən uşaqlar 9-cu sinifdən sonra İnformatikaya deyil Kimya fənninə resurslar ayırırlar".
 
Osman Gündüz qeyd edib ki, əvvəllər "İnformatika yoxsa Kimya" probleminin həm də DİM və Təhsil Nazirliyi arasındakı ziddiyyətlərdən, maraq toqquşmalarından doğan bir problem olduğu bildirilirdi. Lakin görünən odur ki, DİM bu məsələdə aşırı dərəcədə dirəşib.
 
Cəmiyyətin bütün təpkilərinə və son zamanlar MİQ müsabiqələrindən sonra informatika fənninin tədrisində qazanılan uğurlara baxmayaraq, çox sayda yeni İT ixtisaslar yaradılmasına baxmayaraq "İnformatika yoxsa Kimya" probleminin həll olunmaması düşünmək üçün əsaslar verir ki, bu problemin davam etməsində, ölkədə milli İT kadrların formalaşmamasında, İnformatikanın elə yerindəcə boğulmasında maraqlı olan qüvvələr var:
 
"Ümid edirəm hökumət uzun illər davam edən bu problemin vurduğu zərərin fərqindədir və onun həlli üçün ciddi addımlar atacaq".
 
 

ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.