AZNET

Alman Der Spiegel jurnalında yazılan xəbərə görə, İspaniyanın Mejarada del Campo qəsəbəsində göydən buz yağıb. 13 mart 2007-ci ildə həmin ərazidə səma göm-göy imiş, amma birdən qəribə hadisə baş verir. Haradan gəldiyi bilinməyən 20 kiloqram ağırlığındakı buz parçaları yerə tökülməyə başlayır. Bir binanın damına və avtomobilə zərər dəyir.

Bina sahibi bir hücumla qarşı-qarşıya olduqlarını düşünərək polisə xəbər verib. Gördükləri buz parçaları qarşısında heyrətə düşən polis alimlərə üz tutub. Alimlər müəyyən tədqiqatlar aparıblar, amma havanın açıq olduğu bir anda düşən bu buz parçalarının haradan gəldiyini açıqlaya bilməyiblər. Əslində iki şey məlumdur: Buz parçaları kosmosdan gəlmir, ya da bir təyyarənin tualetindən aşağıya düşmür.

 İspan geoloq Jesus Martinez-Frias 2002-ci ildən bu yana dünya səviyyəsində İspaniyadakı hadisəyə bənzər 75 hadisə meydana gəldiyini açıqlayıb. Martinez-Frias buz parçalarının insan həyatı üçün çox təhlükəli ola biləcəyini ifadə edir.

İspaniyadakı hadisəyə NASA da qiymət verməyə çalışıb. NASA buz parçasının düşdüyü gün İspaniya üzərində ozon təbəqəsində nazikləşmə olduğunu açıqlayıb və səbəb kimi də bunu göstərib. Alimlər isə digər hadisələrdə belə bir hala rast gəlmədiklərini açıqlayırlar. Bir sözlə texnologiyanın sürətli inkişafı hələ də hadisələrə qiymət verməkdə çətinlik çəkir.