SOSİAL MEDIA

Əhaliyə göstərilən elektron xidmətlərin keyfiyyətini yüksəltmək, vətəndaşlarla informasiya münasibətlərini daha çevik və effektiv qurmaq məqsədilə şirkətlərlə bərabər bir sıra dövlət qurumları da sosial mediada aktivlik göstərir.

Son dövrlərdə dövlət qurumları öz elektron xidmətlərini, ümumiyyətlə, göstərdikləri fəaliyyətləri daha geniş kütləyə operativ çatdırmaq üçün sosial medianın imkanlarından geniş istifadə edir.

Müşahidələrimiz göstərir ki, artıq bəzi dövlət qurumları rəsmi saytları ilə yanaşı, sosial şəbəkələrdə də aktivliklərini artırıblar. Belə ki, qurumlar operativ fəaliyyət göstərmək, vətəndaşların suallarını birbaşa cavablamaq üçün ölkədə populyar olan Facebook sosial şəbəkəsində öz rəsmi səhifələrini yaradaraq xidmət göstərirlər.

Bu yaxınlarda ASAN xidmət-in səhifəsinin Facebook tərəfindən birbaşa rəsmi şəkildə təsdiq edilməsi onu göstərir ki, həqiqətən də dövlət qurumları bu məsələyə ciddi yanaşıb, vətandaşlara sosial şəbəkə üzərindən də səmərəli xidmət etməyə cəhd göstərirlər.

Həmçinin Vergilər Nazirliyinin, Tələbə Qəbulu üzrə Dövlət Komissiyasının, “Elektron Hökumət”  portalının, Təhsil Nazirliyinin, Dövlət Qulluğu Məsələləri üzrə Komissiyanın,  Daxili İşlər Nazirliyinin Baş Pasport, Qeydiyyat və Miqrasiya İdarəsinin  rəsmi Facebook səhifələrində də aktivlik müşahidə olunur.  

Son zamanlarda bu sahədə aktivliyi  ilə seçilən qurumlardan biri də RYTN tabeliyində  İnformasiya Texnologiyaları İnkişafı Dövlət Fondudur.

Xeberler.az-ın məlumatına görə, bu qurum müsabiqələrlə bağlı , həyata keçirdiyi tədbirlərlə, qrantların verilməsi qaydaları və digər sualların operativ cavablandırılması üçün Facebook-un imkanlarından yetərincə faydalanmağa çalışır.

Məlumdur ki, hazırda Fond  tərəfindən elan edilmiş 3-cu qrant müsabiqəsinə təqdim edilmiş layihələrin qiymətləndirilməsi həyata keçirilir.

Bu məqamda da  vətəndaşların çoxsaylı sualları Fondun rəsmi Facebook səhifəsindən birbaşa cavablandırılır.

Belə ki,  dövlət qurumunun  Facebook səhifəsində vətəndaşın sualına cavab vermək üçün müddət bir neçə dəqiqə göstərilib. Yəni, bu o deməkdir ki, sizin müraciətiniz bir neçə dəqiqə ərzində cavablandırılmış olacaq.

 Fondunun rəsmi Facebook səhifəsinin sol tərəfdə yuxarı küncündə “mesajlara cavab vermə faizi yüksəkdir” işarəsi yerləşdirilib ki, üzərinə klik edən zaman mesaj göndərmək üçün pəncərə açılır. Və bir neçə dəqiqə ərzində İnformasiya Texnologiyaları İnkişafı Dövlət Fondu sizin bütün suallarınıza cavab  verir.

Qeyd edək ki, bu funksiya  ilk dəfə məhz İnformasiya Texnologiyaları İnkişafı Dövlət Fonduun Facebook  səhifəsində istifadəyə verilib. Digər dövlət qurumlarının səhifələrində belə xidmət və cavablandırma müddətinin dəqiqələrlə olduğu  müşahidə edilmir.

İT-in İnkişafı Dövlət Fondunun layihələr üzrə iş sektorunun müdiri Əkbər  Abbasov Xeberler.az-a bildirib ki, Fondun Facebook səhifəsində sualların cavablandırılması üçün Layihələrlə İş sektorundan 3 işçisi və Sahibkarlığın İnkişafı sektorundan bir əməkdaş bu işə cəlb edilib.

Onun sözlərinə görə, hazırda müsabiqə  ilə bağlı  Fond tərəfindən fəaliyyətlər davam etdiyi üçün Fondun Facebook səhifəsinə çoxlu sayda müraciətlər daxil olur və bu suallar Fondun işçiləri tərəfindən operativ  cavablandırılır:

“Həftə içində səhifəmizə 50 -60 sual daxil olursa , həftə sonu sualların sayı nisbətən az olur. Baxmayaraq ki, dövlət qurumları həftə sonlarında fəaliyyət göstərmir, lakin biz  müasir informasiya texnologiyalarının inkanlarından geniş istifadə etməklə məsələni qısa zamanda həll edirik”.

Əkbər Abbasov qeyd edib ki, hətta   Fondla  bağlı öz şəxsi  mobil cihazlarına daxil olan müraciət bildirişlərini də  istirahətdə olsalar belə dərhal cavablandırmağa çalışırlar:

“Əsas məqsəd bütün müraciətləri operativ cavablandırmaq yox, müraciətlərə dəqiq cavab verməkdir. İş saatının 18:00-a kimi olmasına baxmayaraq  İT sahəsində çalışanların gecə daha aktiv olduğunu nəzərə alıb  axşam saatlarında daxil olan müraciətlərə işçilərimiz tərəfindən nəzarət edilir”.

Fondun  Facebook səhifəsini 2 mindən çox  istifadəçi bəyənib.

Sevinc Çəltikova