İNTERNET

İnformasiya Kommunikasiya Texnologiyaları Agentliyi (İKTA) internet xidmətlərinin topdan satışı və ümumistifadəli telekommunikasiya şəbəkəsinə qoşulma fəaliyyəti ilə məşğul olan şirkətlərlə onlayn görüş keçirib.

Xeberler.az məlumat verir ki, görüşdə internet xidmətləri bazarında şəbəkələrin dayanıqlılığının gücləndirilməsi, istehlakçı hüquqlarının müdafiəsi, kibertəhlükəsizlik tələblərinin icrası, telekommunikasiya infrastrukturunun səmərəli inkişafı və normativ uyğunluğun artırılması məsələləri müzakirə olunub.

Müzakirələr zamanı telekommunikasiya fəaliyyətinin qanunvericiliklə müəyyən edilmiş tələblərə uyğun həyata keçirilməsinin, göstərilən xidmətlərin hüquqi əsaslarının tam şəkildə rəsmiləşdirilməsinin və bazar iştirakçılarının üzərinə düşən öhdəliklərin yerinə yetirilməsinin əhəmiyyəti vurğulanıb.

Görüşdə ümumistifadəli telekommunikasiya şəbəkələrinə qoşulma, topdansatış internet xidmətlərinin təqdim edilməsi, şəbəkələrin təhlükəsizliyi və dayanıqlılığı ilə bağlı mövcud yanaşmalar ətrafında qanunvericiliyin tələbləri izah olunub, bu istiqamətdə tətbiq edilən tənzimləmə mexanizmləri nəzərdən keçirilib.

Qeyd olunub ki, topdansatış internet xidməti göstərən operatorlar ümumistifadəli telekommunikasiya şəbəkəsinə qoşulmanın formalaşdırılmasında mühüm rol oynayırlar. Bildirilib ki, bu operatorlar bağlantı təqdim etdikləri subyektlərin hüquqi uyğunluq və texniki hazırlıq səviyyəsinə xüsusi diqqət yetirməlidirlər.

Həmçinin vurğulanıb ki, ümumistifadəli şəbəkəyə çıxış imkanının nəzarətsiz və qeyri-şəffaf şəkildə təqdim olunması xidmət keyfiyyətinə, məsuliyyət bölgüsünə və son istifadəçi hüquqlarının qorunmasına mənfi təsir göstərə bilər. Bu baxımdan topdansatış seqmentində məsuliyyətli qoşulma yanaşmasının tətbiqi, şəffaf provayderlərarası münasibətlərin qurulması və qanunvericiliyin tələblərinə uyğun fəaliyyət göstərən bazar iştirakçıları ilə əməkdaşlığın mühüm əhəmiyyət daşıdığı qeyd edilib.

Görüş iştirakçıları internet xidmətləri bazarında şəffaflığın artırılması və xidmət keyfiyyətinin yüksəldilməsi istiqamətində əməkdaşlığın davam etdirilməsinin vacibliyini vurğulayıblar.

Bildirilib ki, İKTA tərəfindən bu istiqamətdə təhlillər və institusional koordinasiya tədbirlərinin davam etdirilməsi nəzərdə tutulur.