Ölkədə ilk dəfə Azərbaycan Dili və Ədəbiyyatı Forumu keçirilib. Faydalı addımdır.
Mədəniyyət Nazirliyi, Elm və Təhsil Nazirliyi və AMEA əsas təşkilatçılar olub.
Düşündüm ki, bəlkə hazırda olduqca vacib olan Azərbaycan dilinin milli korpusu-azcorpus məsələsini də müzakirə ediblər.
Forumla bağlı məlumatları bir az araşdırdım, gördüm ki, ancaq köhnə problemlər, ədəbi problemlər, kitab və mütaliə və s . məsələlər müzakirə predmeti olub.
Düşünürəm ki, bu sahədə daha aktual, müasir və daha strateji olan azcorpus məsələsini müzakirə etmək çox faydalı olardı.
Hələ də müəyyən deyil ki, Azərbaycan dilinin milli korpusunu kim hazırlayacaq
Ana dilimizdə süni intellekt həllərinin və NLP (təbii dilin emalı) layihələrin inkişafı üçün, Ana dilimizdəki mətnlərin emalı və riyazi-statistik təhlili üçün, kompüter dilçiliyinin inkişafı üçün bir nömrəli məsələ milli korpus və onun inkişafı məsələsidir.
Bu istiqamətdə hazırda müxtəlif qruplar, təşkilatlar və şirkətlər müəyyən addımlar atırlar, nəsə etməyə çalışırlar. Heç olmasa onları foruma dəvət etmək, dinləmək olardı. Fikrimcə, RİNN, AMEA, ETN bu məsələyə ciddi önəm verməlidir.
Düşünürəm ki, azcorpus-la məşğul olan qruplara kömək etmək , Azərbaycan dilində mövcud olan nəhəng datanı bir yerə toplanmaq lazımdır. Bu işə ciddi resurslar ayrılmalı, onun üzrərində tədqiqatlar aparılmalı və modellər işlənməlidir, milli korpus istifadə üçün faydalı bir hala gətirilməlidir.
Osman Gündüz,
Azərbaycan İnternet Forumunun prezidenti, ekspert
