"Təhsil Nazirliyi rəsmi məlumat yayıb ki, yeni tədris ilində təhsilin təşkili ilə bağlı müxtəlif modellər üzərində iş gedir. Bu çox yaxşı bir haldır. Güman ki, yaxın günlərdə bu modellər hökumətə təqdim olunacaq.
Bu, hazırda cəmiyyəti ciddi narahat edən bir məsələdir. Təhsil Nazirliyi tez bir zamanda aşağıdakı məsələlərə aydınlıq gətirməlidir:
1. Hibrid təhsil forması ( Əyani+Distant) olacaqsa şagirdlər və tələbələr üçün kompüter və internet təminatı necə olacaq? Kimlər buna cavabdehdir? Təhsil Nazirliyi bilirmi ki, neçə ailədə kompüter və internet var. Bir ailədə bir neçə təhsil alan varsa texnoloji avadanlıq bölgüsü necə olacaq?
2. Fənlər üzrə elektron, rəqəmsal resurslar yetərlidirmi? Müəllimlər və təhsil alanlar hansı rəqəmsal təhsil platformasından istifadə edəcəklər, buna hazırlıq necədir?
3. Müəllimlərin distant tədrisə hazırlığı yetərlidirmi? Müəllimlərin internet təminatı necə olacaq? Onlara bu məsələdə dəstək olacaqmı?
4. Distant təhsil forması hazır olan təhsil müəssisələrinə bu formada təhsilin təşkili üçün müstəqillik veriləcək yoxsa hər şey mərkəzləşmiş qaydada olacaq ?
5. Evində internet bağlantısı olmayan neçə şagird və tələbə var? Belə araşdırma aparılıbmı?
Bu problemin həlli necə olacaq?
Düşünürəm ki, hökumətə modelləri təqdim etməzdən öncə Təhsil Nazirliyinin maraqlı tərəflərin iştirakı ilə müzakirə təşkil etməsi də faydalı olardı.
Fikrimcə hökumətin dəstəyi olmandan Təhsil Nazirliyini yeni tədris ilində təhsilin təşkilində ciddi problemlər gözləyə bilər.
Düşünürəm ki, Nazirlər Kabinetində bununla bağlı ayrıca bir toplantının keçirilməsi, əlaqədar mərkəzi icra qurumlara təhsilin təşkili istiqamətində Təhsil Nazirliyinə köməkliklə bağlı tapşırıqlar verilməsi, lazım gələrsə texniki-texnoloji təminatla bağlı Nazirlər Kabinetinin yeni resurslar ayırması doğru olardı".
Azərbaycan İnternet Formunun Prezidenti, ekspert Osman Gündüz
