TƏDBİRLƏR

İqtisadiyyat Nazirliyi və BMT-nin Azərbaycan Nümayəndəliyi tərəfindən birgə keçirilən Respublika İnnovasiya Müsabiqəsinin yekunlarına dair tədbir keçirilib.

BMT-nin Dayanıqlı İnkişaf üzrə Gündəliyinin məqsədlərinin yerinə yetirilməsi, innovasiyaların həvəsləndirilməsi, həmçinin "Azərbaycan 2020: Gələcəyə Baxış" İnkişaf Konsepsiyası və "Kiçik və orta sahibkarlıq səviyyəsində istehlak mallarının istehsalına dair Strateji Yol Xəritəsi"nin icrasına dəstək məqsədi ilə təşkil olunmuş İnnovasiya Müsabiqəsi ölkəmizdə innovasiya sahəsində bu formatda keçirilən ilk tədbirdir.

Xeberler.az bildirir ki, müsabiqəyə İqtisadiyyat Nazirliyi və ASAN xidmət-in "İdeya Bankı" vasitəsilə iqtisadi, sosial və ekoloji sahələri əhatə edən 200-ə yaxın layihə təqdim olunub.

Tədbirdə çıxış edən İqtisadiyyat naziri Şahin Mustafayev müsabiqənin İnnovasiyalara marağı daha da artırmaq məqsədilə keçirildiyini, bu cür tədbirlərin innovativ subyektlərin fəaliyyətinin stimullaşdırılması və səmərəliliyin artırılması, innovasiya infrastrukturu çərçivəsində kiçik və orta sahibkarlığın inkişafı üçün zəruri şəraitin yaradılması, elmi-tədqiqat bazasının təkmilləşdirilməsi və innovasiya fəaliyyətinin kadr potensialının inkişafı baxımından vacibliyini vurğulayıb. Bildirilib ki, müsabiqənin təşkili məqsədilə dövlət qurumları və BMT-nin nümayəndələrindən ibarət komissiya yaradılıb, ötən müddət ərzində müsabiqənin təşviqi və ictimaiyyətin maarifləndirilməsi istiqamətində bir sıra görüşlər keçirilib, innovasiya layihələrinin qəbulunun sadələşdirilməsi üçün ASAN xidmət-in "İdeya Bankı" platformasından istifadə olunub. 

BMT-nin Azərbaycandakı rezident əlaqələndiricisi Qulam İshaqzai innovasiyaların rolu barədə danışıb, belə müsabiqələrin gələcəkdə innovativ sahələrə investisiya qoyuluşlarının təşviqinə, elmi nailiyyətlərin və yeniliklərin müxtəlif sahələrdə tətbiqi imkanlarına, həmçinin milli innovasiya sisteminin təkmilləşdirilməsinə töhfə verəcəyini qeyd edib.

Sonra İnnovasiya Müsabiqəsi çərçivəsində görülmüş işlərə, müsabiqənin məqsəd və əhəmiyyətinə dair video çarx nümayiş olunub, qalib elan edilmiş innovativ layihələrin, habelə Hindistanda keçirilən Qlobal Sahibkarlıq Sammitində mükafata layiq görülmüş yağışdan elektrik enerjisi əldə edən "Rainergy" layihəsinin müəllifi Reyhan Camalova və Zəhra Qasımovanın birgə təqdimatı keçirilib. Təqdimatlar tədbir iştirakçıları tərəfindən maraqla qarşılanıb.

Sonda İnnovasiya Müsabiqəsində qalib elan edilmiş ilk üç layihənin, eləcə də böyük marağa səbəb olan və həvəsləndirici mükafata layiq görülmüş layihələrin müəlliflərinə diplomlar və mükafatlar təqdim olunub.

Sonda İnnovasiya Müsabiqəsində qalib elan edilmiş ilk üç layihənin, eləcə də böyük marağa səbəb olan və həvəsləndirici mükafata layiq görülmüş layihələrin müəlliflərinə diplomlar və mükafatlar təqdim olunub.

Xeberler.az