RƏQƏMSAL DÜNYA

Bakı, 12 aprel 2022-ci il – Avropa İttifaqı (Aİ) və BMT-nin İnkişaf Proqramı Azərbaycanda sosial sahibkarlıq gündəliyinin inkişafına dəstək məqsədilə müzakirələrin təşkilinə davam edir.

Xeberler.az bildirir ki, Aİ-nin maliyyələşdirdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi çərçivəsində keçirilən bu tədbirlər sosial sahibkarlar, hökumət nümayəndələri və ekosistemin digər tərəfləri olmaqla 40 nəfəri bir araya gətirib. İştirakçılar sosial sahibkarlıq sahəsindəki çətinlikləri müzakirə edib və həll yollarının yaradılması üzrə çalışıblar.

BMTİP-nin müvəqqəti işlər vəkili cənab Suxrob Xojimatov tədbirdə iştirak edib və açılış nitqində sosial müəssisələrin sosial-iqtisadi çətinliklərin həll edilməsində, eləcə də Dayanıqlı İnkişaf Məqsədlərinə nail olunması istiqamətində dəyərli rolunu vurğulayıb.

12 aprel tarixində təşkil edilən seminarda qadınların və əlilliyi olan şəxslərin məşğulluğunun dəstəklənməsi, kənd fermerlərinə yardım, region gənclərinin təhsil imkanlarının yaxşılaşdırılması, eləcə də ekoloji xidmətlərin göstərilməsi kimi müxtəlif sahələrdə çalışan sosial sahibkarlar iştirak edib.

“Dünya kafesi” (world café) formatında təşkil edilən tədbir iştirakçılara sosial biznesin idarə edilməsi ilə bağlı təcrübələrini açıq şəkildə bölüşmək və sosial sahibkarlıq ekosisteminin inkişafı yollarını birgə tapmaq imkanı yaradıb.

Bu tədbirlər, layihənin sosial sahibkarlıq siyasətləri üzrə müzakirələri seriyası çərçivəsində keçirilir və beynəlxalq ekspert xanım Lana Lovaşiç tərəfindən aparılır. Lana Lovaşiç sosial sahibkarlıq və sosial iqtisadiyyat, o cümlədən innovasiya, tədqiqat və siyasət işləri istiqamətində 15 ildən artıq təcrübəyə malikdir.

Seminar zamanı ekspert sahə üzrə mövcud şəraitin təhlili məqsədilə Azərbaycanın sosial sahibkarları arasında keçirilən sorğunun nəticələrini təqdim edib. O, həmçinin ekosistemin SWOT təhlili nəticələrini və gələcək siyasət tədbirlərinin tətbiqi üçün prioritet sahələrlə bağlı fikirlərini iştirakçılarla paylaşıb.

Keçirilən seminarlar, görüşlər və məsləhət sessiyaları vasitəsilə layihə, Azərbaycanda sosial sahibkarlıq üzrə dəstəkləyici siyasət çərçivəsi yaratmaq üçün ölkənin səylərini sürətləndirməyi hədəfləyir. Belə ki, bu siyasətlər çərçivəsi daha çox insana sosial-iqtisadi problemlərin həllinə yönələn bizneslərə başlamağa və genişləndirməyə imkan verəcək.

Sözügedən mövzunun müzakirəsi digər hökumət nümayəndələri, innovasiya mərkəzləri, biznes inkubatorlar və ekosistem ekspertlərinin iştirakı ilə 14 aprel 2022-ci il tarixində keçiriləcək növbəti tədbirlə davam edəcək.

***

Tədbirlər silsiləsi, Aİ-nin maliyyələşdirdiyi və BMTİP-nin həyata keçirdiyi “Azərbaycanda innovasiya əsaslı və dayanıqlı vətəndaş cəmiyyətinin inkişafı” layihəsi tərəfindən təşkil edilir.
Layihə - siyasətlərin formalaşdırılması, yerli inkişafa dəstək, sosial sahibkarlıq və sosial innovasiyanın təşviqi sahələrində VCT-lərin iştirakının artırılması məqsədilə onların potensialının gücləndirilməsini hədəfləyir.