TƏDBİRLƏR

İnnovasiyalar Agentliyi ilə Çex Respublikasının Cənubi Bohemia Universiteti arasında Texnologiyaların transferi sahəsində razılıq əldə olunub.

Agentlikdən AZƏRTAC-a bildirilib ki, texnologiyaların ixracı sahəsində investorların, ali təhsil müəssisələrinin və şirkətlərin Mərkəzi Avropa məkanına çıxışı üçün vahid əməkdaşlıq platforması yaradılıb.

Sentyabrın 30-da İnnovasiyalar Agentliyinin inzibati binasında Cənubi Bohemia Universitetinin rəhbərliyi ilə görüş təşkil olunub. Görüşdə elm və sənaye arasında bağlantı, qarşılıqlı sifariş və təklif münasibətlərinin yaradılması, ixtiraçılıq fəaliyyətinin keyfiyyətcə artması, innovativ, o cümlədən startap layihələrin dəstəklənməsi, elmi-tədqiqatların nəticələrinin kommersiyalaşdırılması, həmçinin texnologiyaların və layihələrin hədəf bazarlarına çıxarılması istiqamətində müştərilərə müvafiq xidmətlərin göstərilməsi sahələrində geniş müzakirələr aparılıb. Sadalanan fəaliyyət istiqamətləri üzrə Agentlik ilə Cənubi Bohemia Universiteti arasında 2021-ci ilin yanvarında imzalanmış anlaşma memorandumunun Fəaliyyət Planı bu gün keçirilən görüşdə müzakirə olunaraq razılaşdırılıb.

Xeberler.az məlumat verir ki, İnnovasiyalar Agentliyinin İdarə Heyətinin sədri Tural Kərimli yeni təşəkkül tapmış əməkdaşlıqla bağlı bildirib ki, Azərbaycanda biznes mühitinin davamlı inkişafına və milli ekosistemin regional innovasiya mərkəzinə çevrilməsinə önəmli təkan vermək istiqamətində Agentlik beynəlxalq tərəfdaşlarla yeni layihələr üzərində çalışır.

Qeyd edək ki, görüşdə Cənubi Bohemia Universitetinin prorektoru Hojdekr Michal, Texnologiyaların Transferi departamentinin rəhbəri Ruzena Stemberkova və Çex Ticarət Evinin Bakıdakı nümayəndəliyinin rəhbəri Pavel Zelenka iştirak edib.

Görüşün sonunda çex qonaqların iştirakı ilə Agentliyin “Tərəfdaşlar lövhə”sinə Cənubi Bohemia Universitetinin adı yerləşdirilib.