İstədiyiniz kitabın qısa məzmunu bir platformada–ReadIt

29-01-2016 / 11:11

Bədii ədəbiyyatları elektron formatda “tez və rahat” oxumağa imkan verən Azərbaycanda yeni  internet layihəsi- ReadIt saytı yaradılıb.

Layihənin təsisçisi Elmir Kərimli  Xeberler.az-a bildirib ki, ReadIt geniş miqyaslı və unikal bir layihədir. Onun sözlərinə görə, layihə  Azərbaycanın hüdudlarından kənar çıxan ilk yerli startaplardan biridir:

“ Layihə biznes ədəbiyyatı oxucularına Azərbaycan, rus, ingilis və gürcü dillərində təqdim etməklə öz əhatəsini Gürcüstan, Rusiya, Ukrayna və Şərqi Avropanın İngilis dilli auditoriyasının sərhədlərinədək genişləndirməyi hədəfə alıb”.

Elmir Kərimli deyib ki, www.readit.az saytının unikallığı və aktuallığı ondan ibarətdir ki, oxucular nəinki lazımi biznes və ya digər qeyri bədii ədəbiyyatının axtarışına vaxt sərf etməyəcək, ən əsası onun oxunmasına sərf olunan vaxta qənaət edəcək:

“Məhz müasir insanın ən qiymətli aktivi – vaxtı nəzərə alaraq, ReadIt layihəsinin yüksək ixtisaslı beynəlxalq komandası sizin şəxsi və peşəkar yüksəlişiniz üzərində işin maksimum asan, tez və əyləncəli olmasını təmin etmək məqsədilə bu layihəni yaratdıq.  İl ərzində dünyada, bizim “must read” hesab etdiyimiz yüzlərlə faydalı kitab dərc olunur. Lakin onlardan neçəsini oxumuşuq, və ya oxumağa başlayıb sona çatdırmamışıq? “Oxumamağımızın” və ya “sona çatdırmamağımızın” səbəbləri müxtəif ola bilər, lakin ən əsas səbəb – vaxt və kitabın əldə olunması prosesidir. Məhz buna görə də, layihənin məqsədi qeyri bədii ədəbiyyatı yığcam və asan anlaşılan şəkildə təqdim etməkdir”.

Layihə rəhbəri qeyd edib ki, ReadIt dünya üzrə bütün dövrlərin ən yaxşı və faydalı bestseller kitablarının xülasəsini (summary) özündə cəmləmişdirir. Qısa məzmunlu mətnlər kitabın əsas və qiymətli ideyalarını əks etdirir və 7-15 səhifədən ibarətdir:

"Read It-də qısa məzmunlu kitabları oxumaqla siz minimum vaxt ərzində müəlliflərin bilik və təcrübəsinə, məsələnin mahiyyətinə yiyələnəcəksiniz. Əldə etdiyiniz bilikləri daha da möhkəmləndirmək üçün bəzi kitabların xülasəsi əsasında test tapşırıqları da hazırlanılıb. Bu testlər sizin və əməkdaşlarınızın kitabın əsas ideyasını nə dərəcədə qavradığını yoxlamağa imkan verir”.

Elmir Kərimli bildirib ki, saytda təqdim olunan kitabların bir çoxu, Azərbaycan və gürcü dillərində heç vaxt dərc olunmayıb, bəziləri isə hətta rus dilində də işiq üzü görməyib:

Onun sözlərinə görə, öz oxucularını mütəmadi olaraq yeni bestseller kitablarla operativ təmin etmək məqsədilə ReadIt komandası, “professional və şəxsi inkişafın heç bir hüdudu yoxdur” prinsipinə əsaslanaraq, öz unikal kitabxanasını hər həftə yeni kitablarla zənginləşdirməyə  çalışacaq:

“Layihədə təqdim olunan kateqoriyalara əsaslanaraq deyə bilərik ki, xidmət ilk növbədə, bütün menecer və rəhbərlər, bugünkü və gələcək sahibkarlar, əməkdaşlarının peşəkar və şəxsi inkişafına dəyər verən şirkətlər və müvafiq profilli ali məktəb tələbələri üçün nəzərdə tutulub. Layihə həmçinin dünyagörüşünü artırmaq istəyən savadlı şəxslər və ya sadəcə işgüzar dilini inkişaf etdirmək istəyənlər  üçün də ideal vasitədir”.

Qeyd edək ki, kitabxanadan yalnız elektron formatda və sayta abunə olmaqla istifadə edə bilərsiniz.  Pulsuz xülasəni oxuyub abunə olmağa qərar vermək üçün saytda qeydiyyatdan keçmək lazımdır. Aylıq abunə haqqı 9.90$-dan başlayır. Öz əməkdaşlarının inkişafına dəyər verən şirkətlər üçün isə ReadIt korporativ abunə paketi də təklif edir. 

Məltəm Talıbzadə 


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə