AVADANLIQ

Son illərdə ağıllı mobil cihazlardan istifadənin genişlənməsinin fərdi kompüterlərə və noutbuklara olan tələbatın azalmasına səbəb olacağı ilə bağlı narahatlıq var idi. Hətta sensor ekranlı noutbukların istehsalı, Microsoft şirkətinin Windows 8 əməliyyat sistemi bu narahatlığın kifayət qədər böyük olduğundan xəbər verirdi.

Bu səbəbdən Xeberler.az olaraq bu sahədə ixtisaslaşmış bir sıra mağazalara səfər edib son vəziyətin necə olması, həmçinin noutbuk alarakən nələrə diqqət yetirməyin lazım olması barədə məlumat topladıq.

Əvvəla qeyd etmək lazımdır ki, noutbuklara olan tələbat öz aktuallığını qoruyur, xüsusilə, yeni tədris ilinin başlanması ilə birlikdə bu bazarda canlanma müşahidə edilir. Belə məlum oldu ki, sensor ekranlı noutbuklara əvvəlki kimi maraq  yoxdur, hər halda Microsoftun Windows 10-la birlikdə ənənəvi Windows xüsusiyyətlərini geri qaytarması da bunu təsdiq edir. 

Bazarda ən çox tələbat görən noutbuk markaları arasında Acer, Asus, Dell və Apple MacBook-un adları var. Hewlett-Packard (HP) noutbuklarına olan tələb azalarkən bazara yeni daxil olmuş Lenovoya olan maraq artmaqdadır. Lenovo ilə bağlı müştəriləri əsas narahat edən məqamlar hələ bu markanı tanımamaları və Çin şirkəti olmasıdır.

Müştərilərin hansı parametrlər əsasında noutbuk axtardığını öyrənməyə çalışdıqda aydın oldu ki, bəzi şəxslər noutbuk alarkən ən əhəmiyyətli parametrləri bilsə də, bəziləri bundan məlumatsız olur. Bir çox şəxs RAM-ı, yəni əməli yaddaşın və ya sərt diskin həcminin yüksək olmasını arzulayır, lakin bunlar noutbukların ən asanlıqla dəyişdirilə bilinən və demək olar ki, ən ucuz hissələrdir. Əksər noutbukların prossesoru və video kartlarını sonradan daha yaxşısına dəyişdirmək mümkün deyil. Buna görə noutbuk seçərkən əsas diqqəti onun prossesor və video kartına yetirmək lazımdır ki, sonradan sizi çətinə salmasın.

Noutbuklarla bağlı digər bir məqam isə distributorluq məsələsidir. Ölkədə rəsmi distributoru olmayan markaların noutbuklarını almaq sizi məhsula görə zəmanət almaq və texniki problem yarandıqda rəsmi servisə müraciət etmək imkanından məhrum edə bilər.

Növbəti yazılarımızda müxtəlif büdcələrə və ehtiyaclara cavab  verən noutbuklardan, onları haradan və necə əldə etməyin yollarından bəhs edəcəyik.

Murad Məmmədzadə