TƏHLİL

Multimedia Mərkəzinin rəhbəri Osman Gündüz Moskva danışıqları ilə bağlı Feysbukda paylaşım edib:

"Ötən gün baş tutan 11 saatlıq müzakirə nəticəsində əldə olunan atəşkəs razılığı haqqında ilkin təəssüratlarım:

1. Moskvada görüşün davam etdiyi bir zamanda Prezidentin CNN-lə “vuruşmasına”, ümumiyyətlə, onun son günlərdəki çıxışlarına, “təmas xətti” söhbətinin sona yetdiyini bildirməsinə  rəğmən qənaətim belədir ki, ötən gün Moskvada  imzalanan hər nədirsə, kağız parçasından başqa bir şey deyil.

Güman ki, məqsədyönlü olaraq plan elə qurulub ki, dövlət başçısının imzası olmayan, ratifikasiya olunmayan, Türkiyənin də razılığı ilə qəbul edilən  humanitar mahiyyətli bir sənəd imzalansın, beynəlxalq güclərin təsirləri müəyyən qədər tarazlansın. Bu atəşkəs heç bir halda uzun çəkməməlidir. Bu tip anlaşmanın isə istənilən an pozulması mümkündür.

2. Tam əminəm ki, əgər ermənilər bu geydirmə atəşkəs fürsətindən istifadə edib yenidən toparlana bilsələr, bizim hərbi-texnoloji  üstünlüyümüzü neytrallaşdırmağı bacarsalar, torpaqları indiki anda azad etmək çətin olacaq

3. Ermənilər yenidən toparlana, hərbi üstünlük qazana bilərlərmi? Əgər atəşkəs müddəti uzansa bu, birmənalı olaraq baş tutacaq. Prezident özü də vurğulamışdı ki, müasir silah bazarının coğrafiyası genişdir, güman ki, ermənilər də diaspora gücü ilə, erməni hiyləgərliyi ilə çalışacaqlar müasir silahlar əldə etsinlər.

4. Hazırda qalib tərəf, üstün tərəf bizik. Bu mənada düşünürəm ki, şərtləri biz diqtə etməliyik, Prezidentin bir neçə gün öncə səsləndirdiyi İLKİN ATƏŞKƏS ŞƏRTLƏRİNİN üzərinə getmək lazımdır.

5. Atəşkəs müddətində, günü sabah bircə dəfə də olsa hansısa mülki təyyarələrlə Ermənistana müasir silahların daşınması müəyyən olunsa dərhal döyüş əməliyyatları başlanmalıdır.

Əks halda biz qarşıdakı müharibədə daha böyük itkilər verə bilərik.

Erməni mənbələrinə diqqət etdikdə görmək olurdu ki, onlar müasir silahlar, hərbi texnologiyalar baxımından ciddi səhvlərə yol verildiklərinin fərqindəydilər.

Bunu aradan qaldırmağa onlara imkan vermək olmaz.

6. Məncə ruh düşkünlüyünə qapılmaq, məyus olmaq üçün heç bir əsas yoxdur,  indiki halda bu, ən doğru olmayan yanaşma olardı. Belə olacaqsa biz daha pis vəziyyətlə qarşılaşarıq.

Ona görə də əvvəlki əzmlə, əvvəlkindən daha artıq vətənpərvərliklə, əvvəlkindən daha artıq birləşməklə yalnız irəli!