"Son zamanlar Rusiyadan Ermənistana külli miqdarda müasir, radio- elektron silahların daşınması ciddi müzakirə mövzusuna çevrilib.
Azərbaycanın ciddi etirazlarına baxmayaraq görünür ki, Ermənistanın Rusiya tərəfindən silahlandırılması tam sürətlə davam edir.
Rusiya tərəfinin bununla bağlı verdiyi izahatlar, təyyarə ilə daşınan yüklərin tikinti materialı olması ilə bağlı açıqlamaları da ağlabatan görsənmir. Prezidentin köməkçisi Hikmət Hacıyevin son açıqlamalarından da görsənir ki, münasibətlərdə gərginlik hədsiz çoxalıb.
Ümumiyyətlə, müşahidələr görstərir ki, Rusiya tərəfdən Ermənistana müasir silahların verilməsi məsələsi general Polad Həşımovun Tovuz ətrafında şəhid olmasından sonra gündəmə gəlib.
Xatırlayıram ki, o zaman General Aydəmirov General Polad Həşimovun həlak olması ilə bağlı məsələyə münasibət bildirərkən , bu məsələnin Ali Baş Komandan tərəfindən “elə-belə buraxılmayacağını” bildirmişdi. O, həmçinin Polad Həşimovun vurulmasında istifadə oluna biləcək silahların Ermənistan tərəfdə olmamasına diqqət çəkmişdi. O zaman ekspertlər arasında da belə fikir formalaşmışdı ki, generalımız məhz müasir texnologiyalara əsaslanan silahlarla vurulub.
Beləliklə, baş verənlərdən belə qənaətə gəlmək olur ki, general Polad Həşimovun kordinatlarının qabaqcadan müəyyən edilərək, havadan raket zərbəsi endirə biləcək mərkəzə ötürülməsi və idarə olunan raket zərbəsi ilə vurulması haqqında Azərbaycan tərəfində ciddi şübhələr olub.
Güman etmək olar ki , Ermənistanın radio-elektron silahlara, peyk texnologiyalarından istifadəyə əsaslanan silahlara malik olmadığı haqqında Azərbaycan tərəfdə qabaqcadan ciddi məlumatlar olub.
Düşünürəm ki, Azərbaycan tərəfi dost ölkələrin də köməyi ilə bu şübhələr əsasında ciddi araşdırma aparandan sonra həmin radio-elektron silahların Rusiyadan Ermənistana ötürülməsini aşkara çıxarıb, bu silahların məhz Tovuz döyüşlərinin getdiyi zaman Ermənistan ordusuna verildiyi sübuta yetirilib.
Düşünmək olar ki , hətta Rusyia tərəfinin də mütəxəssislərindən istifadə olunub.
Beləliklə, Azərbaycan Rusiyanı fakt qarşısında qoyub və bundan sonra münasibətlər xeyli gərginləşib.
Adətən bu tip məsələlərlə bağlı rəsmi açıqlamalar verilmədiyindən, şübhəsiz ki, bu yazılanlar da gümanlar üzərində qurulub".
Azərbaycan İnternet Formunun Prezidenti Osman Gündüz
