TƏHLİL

"Məcəllədə rəqabət yaradacaq məhsulların davamlı yerli istehsalını təmin etmək, rəqabətyönümlü mühit formalaşdırmaq, inhisarçılığı aradan qaldırmaq, qiymət siyasətini müəyyən etmək, Antiinhisar Dövlət qurumun səlahiyyətlərini müəyyən etmək və s. nəzərdə tutulub.

Doğurdan da, bizim monopolistlər qədər güclüsü heç yerdə olmazmış. Az qala 15 il keçib, 3 çağırış Parlamentə Məcəlləni qəbul etməyə imkan verməmək elə də asan olmamalıydı. Bizimkilər bunu bacarıblar.

Əminəm ki, gələcəkdə bu fakt bizim oliqarxların gücünün əsas göstəricisi olaraq xatırlanacaq.

Prezident tərəfindən aparılan son islahatlar və ciddi kadr dəyişiklikləri ilə, düzünü desək, oliqarxların bir xeylisi vəzifədən uzaqlaşdırılıb. Bəzi sahələrdə müəyyən uğurlar da əldə edilib. Yəni bunlar inzibati üsullarla, Preizdent fərmanları ilə , kadr dəyişiklikləri ilə baş verib. Təbii ki, Rəqabət Məcəlləsi qəbul edilsəydi daha böyük uğurlara imkan verə bilərdi.

Amma bəzi sahələrdə rəqabətlə, inhisarçılıqla bağlı mühitdə ciddi bir dəyişiklik olmayıb. Hətta elə sahələr var ki pisliyə doğru dəyişib.

Məsələn, İKT sektorunda baş verənlərə diqqət etmək kifayətdir.
Xatırlayıram ki, bu sektorda baş verənlərlə bağlı Antiinhisar Dövlət qurumunun son qərarlarına oxşar qərarlar, təxminən 20 il bundan öncə də qəbul olunmuşdu. Onda da özəl sektorla nəhəg inhisarçı qurum olan Rabitə Nazilriyi arasında çoxsaylı məhkəmə çəkişmələri olurdu.

Artıq mən Rəqabət Məcəlləsi ilə bağlı indiki çağırış Parlamentdən əlimi üzmüşəm.
Əslində gözləmək də sadəlövhlük olardı. Çünki indiki deputatların da çox hissəsinin elə oliqarxların dəstəyi və təşəbbüsü ilə seçildiyi heç kimə sirr deyil. Oliqarxlar vəzifədə olmasa da güman ki, təsirləri qalmamış deyil.

Əgər 2-ci dəfə Prezidentin imzası ilə təsdiqlənən bir sənədin qəbuluna qanunverici orqan tərəfindən bu dərəcədə müqavimət varsa , düşünürəm ki, problem çox ciddidir.

Parlamentin buraxılması və növbədənkənar seçkilərn keçirilməsi ən doğru variant olardı. Təəssüf ki, Ali hakimiyyət bu addımı atmadı.
Görəsən yeni seçiləcək Milli Məclis Rəqabət Məcəlləsini qəbul edəcəkmi?"