SOSİAL MEDIA

Facebook şirkətinin təsisçisi Mark Zuckerberg inkişaf etməkdə olan ölkələri İnternet bağlantısı ilə təmin edəcək pilotsuz uçan aparatlar üçün lazer ötürücüsünü nümayiş etdirib.

Xəbərlər-in RYTN-in saytına istinadən verdiyi məlumata görə, M.Zuckerberg qeyd edib: “Biz pilotsuz uçan aparatların və peyklərin mövcud simsiz şəbəkələrdən kənarda məskunlaşan bir milyard insanı İnternetə qoşmaq üçün bizə verə biləcək imkanları nəzərdən keçiririk”.

Onun sözlərinə görə, Facebook planetin ucqar regionlarında məlumatların ötürülməsi üçün ənənəvi qoşulmanı təmin edə biləcək lazer rabitə sisteminin hazırlanması ilə məşğuldur. Texnologiya uzaq məsafələrə məlumat mübadiləsinin sürətini xeyli artırmağa imkan verəcək. Lazer şüalarını Yerə pilotsuz uçan aparatlar ötürəcək.

Yeni texnologiyaların hazırlanması və təkmilləşdirilməsi ilə Connectivity Lab bölməsi məşğuldur. Alternativ rabitə kanallarından Facebook tərəfindən işə salınan Internet.org layihəsi çərçivəsində istifadə etmək planlaşdırılır. Fondun işinin əsas məqsədi dünyada beş milyard insanın (burada söhbət Afrikanın yoxsul əhalisindən gedir) İnternetə pulsuz çıxışını təmin etməkdir.

Internet.org layihəsinə artıq Malavi, Qvatemala, Kolumbiya, Qana, Zambiya, Tanzaniya, Keniya, Hindistan, Banqladeş, İndoneziya və Filippin qoşulub.

Layihədə Samsung Electronics, Qualcomm, Ericsson, Nokia, MediaTek və Opera Software şirkətləri də iştirak edir və beləliklə, təşəbbüsü bazarın müxtəlif seqmentinin şirkətləri dəstəkləyir.

M.Zuckerberg bildirib ki, inkişaf etməkdə olan ölkələrdə insanların İnternetə və biliklər iqtisadiyyatına qoşulması üçün çoxlu əngəllər var: "Interget.org bu maneələrin dəf edilməsinə yönələn qlobal tərəfdaşlıqdır. Biz çalışacağıq ki, hazırda İnternetdən yararlanmaq imkanından məhrum olan insanları çıxışla təmin edək”.

Sosial şəbəkə İnternetə çıxış imkanlarını artırmaq üçün infrastruktur həllərə orta hesabla 1 milyard dollar xərcləyib və daha çox vəsait sərf etməyi nəzərdə tutur. Layihənin ilkin məqsədi 5-10 il ərzində mobil internet xidmətlərinə görə xərcləri hazırkı dəyərindən 1 faiz azaltmaqdır.

Xeberler.az