"İKTA ötən ilin Hesabatını təqdim edib. Bir neçə gün öncə İKTA rəhbərliyi ilə bu istiqamətdə görüşümüz olmuşdu. Hesabatı da bir xeyli incələmişəm. Sıfırdan yaranan qurum üçün, həm də müstəqil olmayan bir tənzimləyici qurum üçün ötən müddətdə görülən işləri qənaətbəxş hesab etmək olar.
Ən ciddi uğurları olaraq provayderlər bazarında şəffaflıq və əlçatanlıq yaratmasını, internetin keyfiyyətini ölçmək və şikayətləri qəbul etmək üçün ölkə üzrə vahid bir rəqəmsal alət təqdim etməsini, tezliklərin geri qaytarılması mexanizmləri yaratmasını, bəzi hüquqi –normativ qaydaların yaradılması istiqamətindəki səylərini və s. qeyd etmək olar".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirir ki, bütövlükdə sektorun tənzimlənməsi, mobil bazarda rəqabətli mühitin formalaşması, xidmətlərin keyfiyyətinin yüksəldilməsi, ümumiyyətlə qurumun ölkənin İKT bazarına təsir imkanları sahəsində ciddi problemləri qalmaqdadır:
Yəni görünən odur ki hələlik nə telekom operatorlar, nə mobil operatorlar, nə də provayderlər İKTA rəhbərliyindən, onun əməkdaşlarından heç bir halda çəkinmirlər.
Normalda isə, hansısa bir operatorun rəhbəri tənzimləyici olan İKTA-nı görəndə yolunu dəyişməli, yaxud da farağat vəziyyətdə olmalıdırlar.
Görünən isə hələlik odur ki, onları tənzimləyicinin qərarları narahat etmir, hər gün bəsit xidmətlərinin tariflərini qaldırmaqla məşğuldurlar və 5G heç yadlarına da düşmür".
Osman Gündüz ümid edir ki, 2025-də situasiya dəyişəcək. Ümidlənmək üçün də müəyyən əsaslar var:
"Əvvəlki situasiya elə idi ki, Nazirliyin tabeliyində olan İKTA Nazirliyin tabeliyində olan Aztelekoma və müstəqil özəl qurum olan Delta Telekoma , yaxud da AzerTelecoma da eyni münasibət sərgiləməliydi. Müstəqilliyin olmaması da təbii ki müəyyən risklər yaradır.
Hazırda isə, situasiya dəyişib.
Sektordakı operatorlar, əsas oyunçular Prezidentin fərmanı ilə Nazirliyin tabeçiliyindən çıxarılıb və AZCON Holdinqin tərkibinə qatılıb.
Məsələn, son illərdə infrastruktura 150 milyondan çox investisiya yatıran, son 20 ilin ən ciddi problemini - "hər evə optika" problemini birdəfəlik həll edən, ayda 30 milyondan çox gəlir gətirən nəhəng dövlət şirkəti Aztelekomun artıq RİNN-ə hər hansı aidiyyatı yoxdur.
Amma burada hələlik bir incə məqam var ki, AZCON-da Müşahidə Şurasının sədri rəqəmsal inkişaf və nəqliyyat naziridir.
Lakin gələcəkdə elə situasiya yarana bilər ki, AZCON-nun ümumiyyətlə RİNN-ə dəxli olmaya bilər.
Beləliklə, gələcəkdə İKTA-nın tənzimləyici rolunun daha da güclənəcəyini proqnozlaşdırmaq olar".
