İNTERNET BANK VƏ FİNTEX

Mərkəzi Bank tərəfindən xüsusi tənzimləmə rejimi (sandbox) çərçivəsində fəaliyyətin təşkili və idarə olunması üzrə proseslər davam etdirilir. Xüsusi tənzimləmə rejiminin ikinci qəbul dövrü üzrə innovativ məhsulların sınaqdan keçirilməsi məqsədilə daxil olmuş 14 müraciətin qiymətləndirilməsi başa çatdırılıb.

Xeberler.az bildirir ki, qiymətləndirmə nəticəsində müraciətlər arasından 4 innovativ məhsul xüsusi tənzimləmə rejimində, məhdud şərtlərlə sınaqdan keçirilmək üçün uyğun hesab edilib.

Mərkəzi Bankın nəzarəti altında sınaqdan keçiriləcək məhsullar bunlardır:

• “ABB” ASC tərəfindən təqdim edilən “İslam bankçılığı” çərçivəsində Murabaha məhsulu

• “Rabitəbank” ASC tərəfindən təqdim edilən “İslam bankçılığı” çərçivəsində Mudaraba və Murabaha məhsulları

• “PAŞA Sığorta” ASC tərəfindən təqdim edilən “Könüllü sığorta məhsullarının hədiyyə vauçerləri vasitəsilə əldə olunması” məhsulu

• “BİTAZN” MMC tərəfindən təqdim edilən “BİTAZN kriptovalyuta birjası” məhsulu

Qeyd olunan məhsulların məhdud çərçivədə və Mərkəzi Bankın nəzarəti altında sınaqdan keçirilməsi nəzərdə tutulur.

Xatırladaq ki, xüsusi tənzimləmə rejimi innovativ maliyyə xidmət və məhsullarının bazara çıxarılmasına, ölkədə maliyyə inklüzivliyinin artırılmasına, eləcə də maliyyə xidmətlərinin istifadəçilər üçün təhlükəsizliyinin və əlçatanlığının yüksəldilməsinə xidmət edir.

Xüsusi tənzimləmə rejimi və sınaqdan keçiriləcək məhsullar barədə daha ətraflı məlumatla Mərkəzi Bankın rəsmi sandbox reyestrində tanış olmaq mümkündür.