STARTAP AZƏRBAYCAN

Məlumat verdiyimiz kimi,  Startap Azərbaycan 2016 müsabiqəsinə qeydiyyat martın 1-dən başlayıb.

Hazırda müsabiqəyə qeydiyyat davam edir.

 Təşkilat Komitəsindən Xeberler.az-a verilən məlumata görə, bu günə qədər 11 layihə qeydiyyatdan keçib.

Onu da bildirək ki, qeydiyyatdan keçən  layihələrin siyahısı www.startup.az resursunda yerləşdirilib.

Qeydiyyat aprel ayının sonunadək davam edəcək.

Təşkilat Komitəsindən bildiriblər ki, may ayının əvvəllərində Startap Azərbaycan-da qeydiyyatdan keçən layihə komandalarına beynəlxalq ekspertlərin iştirakı ilə təlim keçiriləcək. 

Yarışma 2 mərhələdə həyata keçiriləcək. Ekspertlərin dəyərləndirməsi əsasında 1-ci mərhələdə yarımfinalçılar müəyyən olunacaq  və onların təqdim etdikləri biznes-planlar və layihələrinin təqdimatları əsasında yenidən qiymətləndirmə həyata keçiriləcək. Daha sonra məhdud sayda qaliblər müəyyən olunacaq. 

Startap Azəbaycan 2016-nın yekun təqdimat mərasiminin isə may ayında keçirilməsi nəzərdə tutulur.

Startap Azərbaycan TK-nın qərarına görə bu il yalnız fəaliyyətdə olan, ilkin versiyası hazır olan layihələr (saytın və ya mobil tətbiqin demo versiyası olan, yalnız ideyadan, prototipdən ibarət olmayan layihələr) müsabiqədə iştirak edə biləcək.

Məlumatda qeyd edilib ki, layihələrlə bərabər investorlar, mentorlar, developerlər və İT mütəxəssislər də bu resursda qeydiyyatdan keçə bilər.  

Startap Azərbaycan layihəsinin əsas məqsədi milli startupların üzə çıxarılması və inkişafına dəstək vermək, bu istiqamətdə maarifçilik işləri həyata keçirmək, ölkədə internet biznes mühitini yaxşılaşdırmaq, investorların bu sahəyə diqqətini artırmaq və innovativ ideyaların uğurlu biznes sahəsinə çevrilməsinə yardım etməkdir.

Startap Azərbaycan Layihəsinə  Rabitə və Yüksək Texnologiyalar Nazirliyi ,  İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir.  

ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi  və Cybernet şirkətləri  Startap Azərbaycan-a dəstək verir və sponsorluq edirlər.

Məltəm Talıbzadə