STARTAP AZƏRBAYCAN

Startap Azərbaycan 2016-da layihələrin 1-ci mərhələ qiymətləndirilməsi başa çatıb.

Bu barədə Xeberler.az-a Startap Azərbaycan Təşkilat Komitəsindən məlumat verilib.

Qeyd edilib ki, 1-ci mərhələ səsvermə yekunlaşıb. Hazırda Təşkilat Komitəsi ekspertlərin təqdim etdikləri nəticələri ümumiləşdirir.

TK bildirir ki, sabah nəticələr açıqlanacaq və yarımfinalçılar məlum olacaq.

Qeyd edək ki, ekspertlərə qiymətləndirmə üçün 10 gün vaxt verilmişdi. Bu mərhələ dünən başa çatıb. Qiymətləndirmə 10 ballıq sistem ilə aparılıb.

TK-dən verilən məlumata görə, ekspertlərin əksəriyyəti 1-ci mərhələ qiymətləndirmədə iştirak edib. 

Bu il müsabiqəyə ümumilikdə 45 layihə müraciət edib.

Startap Azərbaycan TK-nın qərarına görə bu il yalnız fəaliyyətdə olan, ilkin versiyası hazır olan layihələr (saytın və ya mobil tətbiqin demo versiyası olan, yalnız ideyadan, prototipdən ibarət olmayan layihələr) müsabiqəyə buraxılıb.

 Bu qaydalara uyğun olan 20 startap layihəsi müsabiqədə iştirak hüquqi qazanıb.

Ekspertlər 20 startap komandasının təqdim etdiyi layihə məlumatları əsasında ilkin qiymətləndirmə aparıb.

Ekspertlərin qiymətləndirməsinin nəticələrinə əsasən, Startap Azərbaycan TK-nın qərarı ilə yarımfinalçılar seçiləcək və seçilən layihələr Startap Azərbaycan yarışmasında mübarizəni davam etdirmək statusu qazanacaq.

Startap Azərbaycan layihəsinin əsas məqsədi milli startupların üzə çıxarılması və inkişafına dəstək vermək, bu istiqamətdə maarifçilik işləri həyata keçirmək, ölkədə internet biznes mühitini yaxşılaşdırmaq, investorların bu sahəyə diqqətini artırmaq və innovativ ideyaların uğurlu biznes sahəsinə çevrilməsinə yardım etməkdir.

Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir.

ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər.

Məltəm Talıbzadə