Startap Azərbaycan 2016 başlayır

25-02-2016 / 10:38

Startap Azərbaycan Təşkilat Komitəsi bildirir ki,  martın 1-dən Startap Azərbaycan 2016 layihəsinə başlanır.

TK-dən Xeberler.az-a verilən məlumata görə, Startap Azərbaycan layihəsinin əsas məqsədi milli startupların üzə çıxarılması və inkişafına dəstək vermək, bu istiqamətdə maarifçilik işləri həyata keçirmək, ölkədə internet biznes mühitini yaxşılaşdırmaq, investorların bu sahəyə diqqətini artırmaq və innovativ ideyaların uğurlu biznes sahəsinə çevrilməsinə yardım etməkdir.

Qeyd edilib ki, layihə çərçivəsində milli startapların müsabiqəsinin, startapçılar üçün təlimlərin, universitetlərdə startap görüşlərinin, Startap Günlərinin, investorlarla görüşlərin keçirilməsi nəzərdə tutulur.

Müsabiqədə fərqlənən startaplara yerli və xarici ekspertlərin dəstəyi ilə xüsusi təlimlər keçiriləcək. Layihə çərçivəsində startaplara komanda formalaşdırmağa köməklik göstərilir. 

Qeyd edək ki, startap layihələrinin qeydiyyat müddəti www.startup.az resursunda aprel ayının sonunadək davam edəcək.

Startap Azərbaycan TK-nın qərarına görə bu il yalnız fəaliyyətdə olan, ilkin versiyası hazır olan layihələr ( saytın və ya mobil tətbiqin demo versiyası olan, yalnız ideyadan, prototipdən ibarət olmayan layihələr ) müsabiqədə iştirak edə biləcək.

Məlumatda qeyd edilib ki, layihələrlə bərabər investorlar, mentorlar, developerlər və İT mütəxəssislər də bu resursda qeydiyyatdan keçə bilər.  

Yarışma 2 mərhələdə həyata keçirilir. Startap Azərbaycan çərçivəsində yarışmalarda iştirak edən startapların ekspert qiymətləndirilməsi təşkil olunur. Ekspertlər İT, maliyyə və marketinq sahəsində tanınmış təcrübəli mütəxəssislərdən ibarət olmaqla Startap Azərbaycan tərəfindən formalaşdırılıb. Ekspertlər özlərinə aid olan startapların qiymətləndirilməsində iştirak etmir.

Ekspertlərin dəyərləndirməsi əsasında 1-ci mərhələdə yarımfinalçılar müəyyən olunur və onların təqdim etdikləri biznes-planlar və layihələrinin təqdimatları əsasında yenidən qiymətləndirmə həyata keçirilir və məhdud sayda qaliblər müəyyən olunur.

Startap Azərbaycan komandası layihənin yekununda uğurlu hesab edilən qalibləri yekun təqdimat mərasimində təqdim edir, qiymətli hədiyyələr və diplomlarla mükafatlandırır, onları investorlara və digər fondlara təqdim edir.

Qaliblərin investorlarla görüşlərinin keçirilməsi də nəzərdə tutulur.

Bu il qalib startaplar akseleratorlarda, innovasiya mərkəzlərində və texnoparklarda iş şəraiti ilə təmin olunacaq. Bu ilki yarışmanın qaliblərinin sponsor təşkilatlar tərəfindən xarici səfərlərinin təşkili də nəzərdə tutulur.

Yekun təqdimat mərasiminin isə may ayında keçirilməsi nəzərdə tutulur.

Startap Azərbaycan layihəsi çərçivəsində ənənəvi “Startap Azərbaycan 2016" milli konfransının da may ayında keçirilməsi  planlaşdırlır.

Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir.

ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edir.

Məltəm Talıbzadə 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.