İNNOVASİYA VƏ STARTAP

Məlumat verdiyimiz kimi,  bu il Startap Azərbaycan müsabiqəsinə  ümumilikdə 45 layihə müraciət edib.

Startap Azərbaycan TK-nın qərarına görə bu il yalnız fəaliyyətdə olan, ilkin versiyası hazır olan layihələr (saytın və ya mobil tətbiqin demo versiyası olan, yalnız ideyadan, prototipdən ibarət olmayan layihələr) müsabiqədə iştirak edə bilərdi.

Bu qaydalara uyğun olan 20 startap layihəsi müsabiqədə iştirak hüquqi qazanıb.

Məlumat verdiyimiz kimi, layihələr 1-ci mərhələ qiymətləndirmə üçün Startap Azərbaycan Ekspert Komissiyasının 11 ekspertinə göndərilib.

"Hazırda 1-ci mərhələ qiymətləndirmə davam edir. 20 layihə ekspertlər tərəfindən qiymətləndirilir. Sabah 1-ci səsvermə başa çatacaq". 

Bu barədə Xeberler.az-a Təşkilat Komitəsindən məlumat verilib.

Məlumatda qeyd edilib ki, ekspertlər startap komandaları tərəfindən təqdim edilən layihə məlumatları əsasında layihənin  ideyası və davamlılığı, cəlbedici olması, riskləri,  gəlirliliyi, əhatə dairəsi, komandanın təcrübəsi  və s. istiqamətlər üzrə təhlil edərək ilkin qiymətləndirmə aparır.

Belə ki, ekspertlərin qiymətləndirməsinin nəticələrinə əsasən, Startap Azərbaycan TK-nın qərarı ilə yarımfinalçılar seçiləcək və seçilən layihələr  Startap Azərbaycan yarışmasında mübarizəni davam etdirmək statusu qazanacaq.

Qeyd edək ki, ekspertlərə qiymətləndirmə üçün 10 gün vaxt verilib.  Bu mərhələ mayın 15-də yekunlaşacaq.

Qiymətləndirmə 10 ballıq sistem ilə aparılır.

TK bildirir ki, yarımfinalçılar seçildikən sonra 2-ci mərhələ qiymətləndirmə prosesi başlayacaq və bu mərhələdə  onlar ekspertlər qarşısında qısa müddətli təqdimatlar edəcəklər. Bu qiymətləndirmənin nəticələri əsasında  Startap Azərbaycan 2016  finalçıları müəyyən olunacaq.

Qaliblərin təqdimatının, həmçinin Startap Azərbaycan yekun təqdimat mərasiminin və ənənəvi Startap Azərbaycan milli konfransının, finala çıxan startaplarla investorların qapalı görüşünün may ayının sonunda keçirilməsi planlaşdırılır.

Startap Azərbaycan layihəsinin əsas məqsədi milli startupların üzə çıxarılması və inkişafına dəstək vermək, bu istiqamətdə maarifçilik işləri həyata keçirmək, ölkədə internet biznes mühitini yaxşılaşdırmaq, investorların bu sahəyə diqqətini artırmaq və innovativ ideyaların uğurlu biznes sahəsinə çevrilməsinə yardım etməkdir.

Startap Azərbaycan Layihəsinə Rabitə və Yüksək Texnologiyalar Nazirliyi , İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir. 

ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər. 

 Məltəm Talıbzadə