TƏHLİL VƏ RƏYLƏR

26-29 May tarixlərində Azərbaycanda “Teknofest” festivalı keçiriləcək.

Xeberler.az bildirir ki, Azərbaycan İnternet Forumunun Prezidenti, ekspert Osman Gündüz festival və sektordakı problemlərlə bağlı öz fikirlərini şəxsi “Facebook” hesabında paylaşıb.

“”Teknofest” festivalı öncəsi uzun müddət təsdiqini gözləyən sənədlərin qəbulu da çox yerinə düşərdi və faydalı olardı :

1. Azərbaycanın İnnovasiya strategiyası, 3 ildən çoxdur ki, təsdiq gözləyir.

Prezidentin 10 yanvar 2019-cu il tarixli fərmanı ilə 5 ay müddətində hazırlanması Prezident Administrasiyasına tapşırılmışdı

2. Azərbaycanın rəqəmsal transformasiya konsepsiyası, bir ildir ki, təsdiq gözləyir.

Prezidentin 21 aprel 2021-ci il tarixli fərmanı ilə Nazirlər Kabineti 4 ay müddətində hazırlayıb Prezidentə təqdim etməli idi

3. “Ağıllı şəhər” və “Ağıllı kənd” konsepsiyası indiyədək təsdiqlənməyib.

Prezidentin 19 aprel 2021-ci il tarixli Sərəncamı ilə işçi qrup yaradılıb. Qrupa rəqəmsal inkişaf və nəqliyyat naziri rəhbərlik edir. 6 ay müddətində Prezidentə təqdim edilməli idi

4. İnformasiya təhlükəsizliyi və kibertəhlükəsizlik strategiyası, 4 ildir təsdiqlənə bilmir. Prezidentin 27 aprel 2018-ci il tarixli sərəncamı ilə hazırlanmalı idi.

Bu qeyd edilən sənədlərin layihələrinin hazırlanmasına məsul olanlar dəfələrlə açıqlayıblarki, layihərlər hazırdı və razılaşdırmalara verilib.

Yeri gəlmişkən, festival öncəsi sektorla əlaqəli daha bir neçə vacib məsələni xatırlatmaq istərdim.

Dron yarışını keçirəcəyimizə baxmayaraq hələ də “Dronların qeydiyyatı və istifadəsi ” ilə bağlı normal qaydalar hazırlanmayıb. Mövcud müvəqqəti qaydalar isə dron gətirilməsi və qeydiyyat üçün 6 dövlət qurumundan icazə alınmasını tələb edir.

Uzun illərdir ki, RİNN, KOBİA və ASAN cəmi 10 maddədən ibarət olan “Vençur maliyyələşmə və vençur fondlar" haqqında qanun layihəsini ortaya çıxara bilməyib.

Kriptovalyutalar haqqında qanunun qəbuluna, e-ticarət haqqında qanunun təkmilləşdirilməsinə də ciddi ehtiyac var.

Bununla da “Teknofest” festivalı öncəsi sektorda mövcud olan bu problemləri və çağırışları bir daha qərar qəbul edənlərə xatırlatmaq istədim.

Ümid edirəm faydası olacaq.”