"Prezidentin fərmanının icra edilməməsi ilə bağlı, daha dəqiq desək konkret bir sahədə dövlət idarəetməsindəki ciddi problemlə bağlı ortada bir nümunə var".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, Prezidentin 2021-ci il 19 aprel tarixli fərmanı ilə Nazirlər Kabineti QHT-lərin qrant müsabiqələri ilə bağlı Qaydalarını təsdiq etməliydi.
"QHT Agentliyi dərhal Qaydaların layihəsini hazırlayaraq təsdiq üçün Nazirlər Kabinetinə təqdim edir.
Uzun müddətdir ki, Nazirlər Kabinetindən səs çıxmır. Maliyyə Nazirliyi isə problemin Agentlikdə olduğunu bildirir.
QHT Agentliyi dərhal açıqlama verir ki, onlarlıq bir iş yoxdur, oturub Qaydaları gözləyirlər.
Bununla bağlı mediada, ictimaiyyət arasında xeyli ictimai müzakirələr gedir. Bu açıqlamalardan sonra Prezident iki gün öncə daha bir fərman verərək Qaydaların hazırlanması səlahiyyətini Nazirlər Kabinetindən alıb, bu səlahiyyət Agentliyə verilib".
Osman Gündüz bildirib ki, bundan sonra məsələ öz həllini tapıb.
"QHT Agentliyinin Müşahidə Şurası ötən gün toplaşaraq Qaydaları təsdiqləyib və qrant müsabiqəsini elan edib.
"Nə üçün Nazirlər Kabineti açıq-aşkar Prezidentin fərmanını icra etməyib, nə üçün Maliyyə Nazirliyi doğru olmayan məlumatlar yayıb və əsassız olaraq digər dövlət qurumunu günahlandırıb, kimdir günahkar ki, yetərincə problemləri olan vətəndaş cəmiyyətinin inkişafını 7-8 ay əngəlləyə bilib".
Son olaraq ekspert bildirib ki, PA Prezidentin fərman və sərəncamlarının icrasının sürətləndirilməsi, dövlət nəzarətinin daha da gücləndirilməsi üçün, qeyd olunan halların təkrarlanmaması üçün daha effektiv həllər təqdim edəcəinə ümid edir.
