Uşaqları zərərli informasiyadan qoruyan qanun qüvvəyə minəcək

23-08-2019 / 16:04

Xeberler.az bildirir ki, gələn il yanvarın 1-dən uşaqların zərərli informasiyalardan qorunması haqqında qanun qüvvəyə minəcək. Bu, uşaqların internetdən təhlükəsiz istifadəsi, televiziya məkanında, sosial şəbəkələrdə qarşılaşdıqları zorakılıqlardan müdafiə olunması məqsədi daşıyır.

Qanun layihəsinə əsasən, uşaqların mənafelərinin üstün tutulması, hüquq və azadlıqlarının təmin olunması, həyat və sağlamlıqları üçün təhlükəsiz, hərtərəfli inkişaf və sosiallaşmalarını təmin edən informasiya məhsullarının dövriyyəsinə şərait yaradılması əsas prinsiplərdəndir. Həmçinin, qanunla zorakılığın, qəddarlığın, narkotik vasitələrin, psixotrop maddələrin, alkoqollu içkilərin və tütün məmulatlarının, cəmiyyət əleyhinə davranışların, pornoqrafik xarakterli informasiyaların uşaqlara təbliğ olunmasına imkan verilməyəcək

Qanun layihəsini şərh edən Azərbaycan Vəkillər Kollegiyasının üzvü Roman Qaraşov  bildirib ki, ölkəmizdə uşaqlarla bağlı dövlət siyəsəti onların zəruri maddi və məişət şəraitində böyüyüb tərbiyə olunmasını, mütərəqqi tələblər əsasında təhsil almasını, layiqli vətəndaş kimi formalaşmasını təmin etməyə yönəlib. 

Onun sözlərinə görə, yeni qanun uşaqların yaşına uyğun informasiya əldə etmək hüququnun həyata keçirilməsini müəyyən edir və bu sahədə yaranan münasibətləri tənzimləyir: “Ölkə qanunvericiliyinə uyğun olaraq hər bir uşağın əqli və fiziki inkişafı üçün zəruri olan istənilən məlumatı axtarmaq, əldə etmək, ötürmək və yaymaq hüququ var. Yeni qanunla isə uşaqlara informasiya məhsullarının istifadəsi üçün münasib yaş həddi nəzərdə tutulacaq. Bu da uşaqlar üçün nəzərdə tutulmayan, təhrif olunmuş sosial təsəvvürlərin formalaşdırılması vasitəsilə onların mənəvi, psixi, fiziki və ya sosial inkişafında pozuntu yaranmasına səbəb olan məlumatların izlənməsini qadağan edəcək”.

“Qanunla fiziki və ya hüquqi şəxslərin uşaqların şüurunda hər hansı davranış qaydası və ya stereotipin formalaşmasına yönəlmiş, yaxud uşağı hər hansı hərəkət və ya hərəkətsizliyə təhrik etdirmək məqsədi daşıyan təbliğinə də nəzarət güclənəcək. Cəmiyyət əleyhinə və hüquqazidd hərəkətləri təbliğ edən informasiya – milli mənəvi, əxlaqi dəyərlərə zidd əməllər törətməyə həvəsləndirən məlumatlar qadağan olunacaq”, - deyə vəkil qeyd edib.

R.Qaraşov bildirib ki, qanunla informasiya məhsulunun üzərində, onun daşıyıcısında və qablaşdırmasında yaş kateqoriyası işarəsinin göstərilməsi nəzərdə tutulur: “Qanun qüvvəyə mindikdən sonra azyaşlılara təqdim olunan informasiyaların mövzusuna, məzmununa və tərtibatına diqqət yetiriləcək”.

Hüquqşünas qeyd edib ki, informasiya məhsulunun yaş təsnifatını ekspert təyin edəcək: “Həmin şəxs pedaqogika, psixologiya və ya uşaq psixiatriyası sahəsində ali təhsilə malik və tələblərə cavab verən şəxs olacaq. Qanunla uşaqlar arasında dövriyyəsi qadağan edilən informasiya məhsullarının uşaqların ola biləcəyi yerlərdə inzibati, texniki proqram və avadanlıq vasitələrinin tətbiq edilmədən yayılmasına yol verilməyəcək. Həmçinin uşaqlar arasında dövriyyəsi qadağan edilən informasiya məhsulunun uşaqlar üçün nəzərdə tutulmuş təhsil müəssisələrində, tibb, sanatoriya-kurort, bədən tərbiyəsi və idman, mədəniyyət, istirahət və sağlamlaşdırma müəssisələrində və ya həmin müəssisələrin sərhədindən 150 metrdən az olan məsafədə yayılmasına yol verilməyəcək”.

“İnanırıq ki, bu qanun uşaq hüquqlarına əməl edilməsi üzərində nəzarəti  gücləndirəcək, onların sağlam düşüncəli və vətənimizə xeyirli övlad kimi böyüməsinə güclü təsir edəcək”, - deyə R.Qaraşov bildirib.

Qeyd edək ki, Azərbaycanda uşaqlara qarşı törədilən hüquqpozmaların qarşısının alınması, uşaqların zərərli informasiyalardan qorunması sahəsində beynəlxalq əməkdaşlığın həyata keçirilməsi də nəzərdə tutulub.


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə