"Hər ay dövlət layihəsindən əldə olunan 1 milyon manat qazanc kimə çatır ?
Elə problemlər var ki, məətəl qalırsan ki, bu nəhənglikdə dövlət nəzarəti sistemi olduğu halda uzun müddətdir ki, onlar öz həllini tapa bilmir. Onlardan birisini qeyd edirəm.
2014-cü ilin noyabrında Prezident “Yeni nəsil şəxsiyyət vəsiqələrinin tətbiqi ilə bağlı” faydalı bir sərəncam verib. Bu tip vəsiqənin ilk nümunəsi hətta Prezidentə də təqdim edilib. Lakin indiyədək də bu şəxsiyyət vəsiqələri “yeni nəsil” olması funksiyasını mənimsəyə bilməyib.
Kimlərsə bu vəsiqələrin çiplərində yerləşən e-imzaları aktivləşdirməyə indiyədək imkan veriməyiblər. Təsəvvür edin ki, bununla əlaqəli NRYTN sistemi, sertifikasiya mərkəzi tam olaraq hazırdı, buna xeyli dövlət vəsaitləri xərclənib, vəsiqələrə çiplər də yerləşdirilir. Amma bunun hər hansı faydası, heç bir əhəmiyyəti yoxdur.
Vətəndaş həmin imzalardan istifadə edərək heç bir rəqəmsal xidmət əldə edə, rəqəmsal üstünlük əldə edə bilmir. Bununla da ölkədə rəqəmsallaşmaya amansız zərbə vurulur, məqsədyönlü olaraq transformasiya prosesləri ləngidirlir. Vətəndaşın əlindəki vəsiqələrdəki hazır e-imza əvəzinə ölkədə ASAN Xidmətə dəxli olmayan ASAN imza tətbiq olunur, xarici vətəndaşın rəhbərlik eydiyi bu dövlət layihəsindən hər ay kimlərsə təxminən 1 milyon manat qazanc götürür.
Beləliklə, dövlətin faydalı bir addımından əslində dövlət və ya cəmiyyət deyil, sadəcə kimlərsə bir qrup şəxs fayda götürür. NRYTN-nin bundan öncəki nazirlərinin bu məsələni həll etməyə sadəcə gücləri çatmayıb. Yəni, belə düşünmək olar ki, həmin maraqlı tərəflərin gücü yetərincədir.
Ümid edirəm və inanıram ki, yeni nazir Rəşad Nəbiyev maraqlı tərəflərin müqavimətini qıra biləcək və rəqəmsal transformasiya üçün mühüm əhəmiyyət kəsb edən bu problemi həll edə biləcək. Ümumiyyətlə, bu tip məsələlər bir daha onu göstərir ki, dövlət nəzarəti məsələlərində problemlər hələ də qalır.
Bu yaxınlarda Prezident tərəfindən fərman, sərəncam və tapşırıqlarının icra vəziyyətinə nəzarətin elektron qaydada həyata keçirilməsi üçün daha bir addım atılıb. “Dövlət Nəzarəti İnformasiya Sistemi” də yaradılıb.
Ümid edirəm dövlət nəzarətinə cavabdeh şəxslər və qurumlar nəzarətin gücləndirilməsi istiqamətində səyləri daha da artıracaqlar".
Azərbaycan İnternet Formunun Prezidenti Osman Gündüz
