E - HÖKUMƏT

“Əhalinin qeydiyyat idarələrinə gəlməyindənsə, notariusların çıxarışlar və qeydiyyat sənədlərini almaları normal təcrübəyə çevrilməlidir”.

Xeberler.az bildirir ki, bunu Əmlak Məsələləri Dövlət Komitəsinin (ƏMDK) İnformasiya texnologiyaları və elektron xidmətlərin təşkili şöbəsinin müdiri Yaşar Niftiyev “Notariuslarla onlayn əlaqə” layihəsi çərçivəsində görülən işlərdən, əldə edilmiş nəticələrdən danışarkən deyib.

Onun sözlərinə görə, artıq ƏMDK-nın Daşınmaz Əmlakın Milli Qeydiyyat Sistemi ilə Ədliyyə Nazirliyinin Elektron Notariat İnformasiya Sistemi arasında elektron məlumat mübadiləsinin həyata keçirilməsi məqsədilə görüləcək işlərin Fəaliyyət Planı hazırlanıb.

Yaşar Niftiyev sistemlərarası məlumat mübadiləsinin həyata keçirilməsi məqsədilə hazırlanan proqram təminatı barədə məlumat verib. O bildirib ki, proqram təminatı 2 fazada hazırlanıb:

“I faza – 2014-cü ilin mart ayından etibarən işə başlayıb. Əmlakın yüklülüyü barədə məlumatlar onlayn qaydada notariuslara ötürülməsi işləri təmin edilib. II faza – 2015-ci ilin iyun ayından etibarən işə başlayıb. Mülkiyyət hüququnun dövlət reyestrində qeydiyyatı məqsədilə müraciət və müqavilənin elektron forması onlayn qaydada qeydiyyat idarəsinə ötürülməsi işləri təmin edilib”.

Şöbə müdiri eyni zamanda “Notariuslarla onlayn əlaqə” layihəsi çərçivəsində əldə edilmiş nəticələrdən də bəhs edib. Yaşar Niftiyevin sözlərinə görə, sistem vasitəsilə ölkə üzrə mövcud olan bütün 150 notariusla (səyyar notariuslar da daxil olmaqla) onlayn əlaqə yaradılıb.

“Əvvəllər əmlak üzərində mülkiyyət hüququ dəyişdiyi zaman vətəndaş 3 dəfə qeydiyyat idarəsinə müraciət etməli olurdusa, hazırda qeydiyyat idarəsinə müraciət etməyə ehtiyac qalmayıb. Belə ki, daşınmaz əmlak üzərində mülkiyyət hüququ dəyişdiyi zamanı vətəndaşlar yüklülük arayışının əldə edilməsi məqsədilə qeydiyyat idarələrinə müraciət etmədən birbaşa notariusa gedir”.

O bildirib ki, notariuslar tərəfindən əmlakın yüklülüyü barədə məlumatlar real vaxt rejimində əldə edilir, müqavilə bağlanılır, mülkiyyət hüququnun Dövlət Reyestrində qeydiyyatı məqsədilə dövlət rüsumu notariusda ödəməklə müraciət və müqavilənin elektron forması onlayn qaydada müvafiq qeydiyyat idarəsinə ötürülür. Müraciətin icra vəziyyəti və xidmət haqqı barədə məlumatları elektron xidmət və ya SMS vasitəsilə öyrənilir. Xidmət haqqı elektron qaydada ödənilir. 

Ruhəngiz Muradova