ADNSU-da startap məktəbinin ilk buraxılış festivalı keçirilib- Foto

01-07-2016 / 10:02

İyunun 30-da ali təhsil müəssisələri arasında ilk olaraq Azərbaycan Dövlət Neft və Sənaye Universitetində (ADNSU) yaradılan Startap məktəbinin buraxılış festivalı keçirilib.

Xeberler.az-ın məlumatına görə, festivalda universitetin rektoru, professor Mustafa Babanlı başda olmaqla müəllim və tələbələr, fəxri qonaqlar - təhsil naziri Mikayıl Cabbarov, Prezident Admnistrasiyasının humanitar şöbəsinin rəhbəri Fatma Abdullazadə, Qafqaz Universitetinin rektoru Əhməd Saniç, o cümlədən digər universitet və müəssisələrdən olan nümayəndələr, eləcə də Ukrayna Milli Texniki Universitetinin nəzdində fəaliyyət göstərən İnformasiya Texnologiyaları və Təhsil İnstitunun direktoru İnna Maryukova, İsraildən olan startap təlimçisi İqor Peer və sair iştirak ediblər.

Təqdimat ADNSU rektorunun müşaviri Rusif Hüseynov tərəfindən aparılıb. İlkin olaraq universitetin rektoru, professor Mustafa Babanlı çıxış edib. Rektor innovativ ideyalara söykənən belə br layihənin məhz ADNSU-da gerçəkləşməsinin qürurverici və məsuliyyət yükü daşıdığını ifadə edib, layihənin həyata keçirilməsi prosesində əməyi və dəstəyi olan insanlara təşəkkürünü bildirib.

Prezident Admnistrasiyasının Humanitar şöbəsinin rəhbəri  F.Abdullazadə startap məktəbin universitetə yeni nəfəs verəcəyinə, yeni uğurların əldə olunmasına dəstək olacağına inandığını deyib. ADNSU-nun Azərbaycanın təhsil sistemində öz rolu və dəsti-xəttinin olduğunu vurğulamaqla şöbə rəhbəri diqqəti burada təhsil alan xarici vətəndaşların səviyyəsinin hər zaman yüksək olmasına yönəldib.

Təhsil naziri Mikayıl Cabbarov startap məktəbinin ADNSU kimi nüfuzlu bir təhsil müəssisəsində həyata keçirilməsinin əhəmiyyətini vurğulamaqla, layihənin məqsədləri, bütövlükdə dövlətimizə, təhsil sisteminə verə biləcəyi töhfələrdən danışıb.

Nazir Azərbaycan Təhsil sistemində startap məktəblərinin məqsəd və səmərəliliyi barədə fikirlərini bildirib. Nazirin çıxışında ölkənin iqtisadi innovativ inkşafının Azərbaycanda, hökumət, universitet və akademik elm və yüksək texnologiyalı sənaye səviyyəsində qarşılıqlı faydalı əməkdaşlıq üzərində qurulmuş yeni innovativ ekosistemi yaratmaq yolu ilə sürətləndirilməsi qeyd edilib.

Daha sonra R.Hüseynov startap məktəbinin yaranma və fəaliyyət tarixçəsi haqqında qısa məlumat verib. Bildirilib ki, startap məktəbləri ölkənin müəllim, tələbə, aspirant, ixtiraçıları üçün tədris mərkəzi olub, praktik bacarıqlar verir və yüksək texnologiyalı startap lahiyələrinin buraxılmasını təmin edir.

Biznes inkubatorları şəbəkəsi startap şirkətlərinə ilkin mərhələdə dəstək mərkəzi olub (təşkilati, hüquqi, infrastruktur, konsultativ, mühasibat baxımından), prototiplərin və kiçik seriyalı istehsalatın başlanmasına yardım edir. Layihələrdə nəzərdə tutulan son məhsullar, prototiplər və s. hazırlanaraq, onların kütləvi istehsalı və tətbiqinə başlanacaq.

Sonra İnna Maryukova Kiyevdə yaradılan startap məktəbinin təcrübəsinə əsaslanaraq layihə çərçivəsində görülən işlər və onun istiqamətləri barədə danışıb. O, bu layihənin ölkəsində uğura imza ata bildiyini deyib və belə bir nəticənin Azərbaycanda - ADNSU-da da əldə olunacağına inandığını söyləyib.

İ.Peer startap layihələrinin xarakteri və bu istiqamətdə qurulan biznesin incə nüanslarının təqdimatını edib. O, startap layihələri çərçivəsində gənclərin öz biznes ideyalarını gerçəkləşdirmələri üçün əvvəlcə problemlərin görülməsini və məqsədə doğru dəqiq addımların atılmasının vacibliyini vurğulayıb. İ.Peer bildirib ki, startap ideyadan, biznesdən başlayan, ideyanı milyonlarla ölçülən biznesə çevirən xəttir.

Festivalda 15 startapçı öz layihələrini təqdim edib. Hər bir layihə müəllifi ayrı-ayrılıqda öz ideyalarının əhəmiyyətini qeyd edib. Ümumilikdə ilkin ideyalar olaraq layihələr rektor və digər iştirakçılar tərəfindən maraqla qarşılanıb. Daha sonra qonaqlar ADNSU-da fəaliyyətdə olan İnkubasiya, Azİİ-İT Club mərkəzləri ilə tanış olublar.

 

Məltəm Talıbzadə

 

 

 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.