STARTAP AZƏRBAYCAN

Yanvarın 29-dan başlayaraq Azərbaycan Dövlət Neft və Sənaye Universitetində (ADNSU) Startap məktəbləri fəaliyyətə başlayacaq.

Bu barədə bu gün  ADNSU-da  səfərdə olan Ukrayna Milli Texniki Universitetinin nəzdində fəaliyyət göstərən İnformasiya Texnologiyaları və Təhsil İnstitutunin direktoru İnna Malyukova və İsraildə Biznes İnkubatorun direktoru, startap sahəsi üzrə  təlimçi İqor Peer  tələbələrlə görüş zamanı bilidirib.

Universitetin mətbuat xidmətindən Xeberler.az-a verilən məlumata görə, tədbiri  universitetin rektoru Musatafa Babanlı açıb və qonaqları təqdim edib.

İqor Peer Startap layihələrinin xarakteri və bu istiqamətdə qurulan biznes barədə məlumat verib, beynəlxalq təcrübəsini bölüşüb.

O, startap layihələri çərçivəsində gənclərin öz biznes ideyalarını gerçəkləşdirmələri üçün əvvəlcə problemlərin görülməsini və məqsədə nail olmaq üçün doğru, dəqiq addımların atılmasının vacibliyini vurğulayıb. Əks halda uğursuzluğun qaçılmaz olduğunu deyən İqor Peer hesab edir ki, innovasiya məhz insan üzərində qurulur və bu onun fikirləri, ideyalarıdır.

Biznesmen hesab edir ki, əgər kimsə öz biznesini qurmaq istəyirsə dəqiq hesablanmış proqram və planla birgə, həm də yaxşı işləməlidir:

“Startap ideyadan, biznesdən başlayır. Biz startap layihələri ilə innovasiyaları öyrənmək istəyirik. İstəyirik ki, insanlar innovativ düşünsünlər və məsələlərə innovativ yanaşmaqla bu prosesdə hansı işlərin görülməsini öyrənsinlər. Startap - ideyanı milyonlarla ölçülən biznesə çevirən xəttir. Startap axtarılır, alınır və inkişaf edir”.

Startap məktəblərinin açılması və qurulması metodları barədə ətraflı məlumat verən İqor Peer daha sonra startap layihəsinin ADNSU-tələbələri üçün maraqlı olacağını deyib və  bu barədə  tələbələrin  suallarını cavablandırıb.

Məltəm Talıbzadə