İKT QADINLAR

Azərbaycanda "Azərbaycan qadınlarının İKT Klubu – FEMMES DIGITALES" Beynəlxalq İKT-də qızlar gününü qeyd edib.

Klubdan Xeberler.az-a verilən məlumata görə, bununla bağlı bir sıra tədbirləe keçirilib.

Xatırladaq ki, BMT-nin İKT məsələləri üzrə təşkilatı olan Beynəlxalq Telekommunikasiya Birliyinin (International Telecommunications Union — ITU) qərarına əsasən hər il aprel ayının 4-ü bu sahədə çalışan və təhsil alan qadınların beynəlxalq günü kimi qeyd edilir.

Bu il "Azərbaycan qadınlarının İKT Klubu – FEMMES DIGITALES" tərəfindən məktəbli və tələbələrə informasiya texnologiyaları sahəsində peşə inkişafını nümayiş etdirmək məqsədilə bir sıra tədbirlər keçirilib.

Bayram çərçivəsində təşkil edilən tədbirlərin tərəfdaşları qismində Beynəlxalq Telekommunikasiya Birliyi və STEP İT Kompüter Akademiyası çıxış edib.

STEP IT Kompüter Akademiyasının konfrans zalında təşkil edilmiş tədbirə  200-dək iştirakçı qatılıb. Bundan əlavə,  FEMMES DIGITALES klubunun nümayəndələri tərəfindən Bakının orta və ali məktəblərində 1000-dən çox qızı əhatə etmiş çoxsaylı görüşlər zamanı öz biliyini artırmağın, bacarıqlarını təcrübədə sınamağın və İKT sahəsi ilə tanışlıqdan sonra həyatını dəyişməyin yolları ilə bağlı söhbətlər aparılıb.

 Həmçinin, xanımlar üçün ölkənin İT bazarının ən qabaqcıl şirkətləri olan R.I.S.K. və Ultra Technologies-ə ekskursiyalar təşkil edilib.

STEP IT Kompüter Akademiyasının tədris siniflərində web-proqramlaşdırma, Scratch proqramlaşdırma dili, LEGO robototexnikası, həmçinin, İT və Adobe Photoshop-la tanışlıq üzrə praktiki seminarlar təşkil edilib. Bundan başqa, MONT Azerbaijan  şirkətinin nümayəndələri  xanımları ən müasir Microsoft Office 365 ofis paketinin imkanları ilə tanış edib.

Tədbirlər zamanı ITU-nun nümayəndələri və digər ölkələrdən olan həmkarlarımızla videokörpülər təşkil edilib  ITU-nun MDB ölkələri üzrə zona bölməsinin koordinatoru Fərid Nəhli FEMMES DIGITALES-in səylərini yüksək qiymətləndirib və bu təşəbbüsün beynəlxalq səviyyəyə çıxması üçün öz dəstəyini təklif edib.

 ASAN xidmətin iş prinsipləri ilə tanış olmaq məqsədilə Azərbaycana səfər etmiş RF-nin Ulyanovsk vilayəti qubernatorunun müşaviri Svetlana Openışeva tədbirin qonağı olub. Beynəlxalq İKT-də qızlar günü bayramı və "Azərbaycan qadınlarının İKT Klubu – FEMMES DIGITALES"in fəaliyyəti bir qismi bu təşəbbüsə ilk dəfə qoşulan çoxsaylı tədbir iştirakçılarına bu maraqlı və dinamik inkişaf edən sahənin yaratdığı karyera imkanlarına fərqli cür baxmağa, ölkənin iri İT şirkətlərində çalışan xanımların iş təcrübəsi ilə tanış olmağa, İT sahəsində uğurlu karyera qurmuş klubun təsisçiləri ilə qeyri-rəsmi şəraitdə söhbətləşməyə imkan yaratmış oldu.

Tədbirin builki sponsor və tərəfdaşları qismində STEP IT Kompüter Akademiyası, Microsoft Azerbaijan, Huawei, proqram təminatı distribütoru MONT Azerbaijan, Cybernet, Azercell və B.EST Solutions şirkətləri olub.

Tədbirin sonunda Beynəlxalq İKT-də qızlar gününün bütün iştirakçılarına xatirə hədiyyələri təqdim edilib.

Qeyd edək ki, ITU-nun məlumatlarına əsasən indiyədək Beynəlxalq İKT-də qızlar günü münasibətilə dünyanın 160 ölkəsində təşkil edilmiş 7200 tədbirdə 240 mindən çox qız və gənc qadın iştirak edib.

Xeberler.az