İKT UŞAQLAR

2026–2027-ci tədris ili üzrə ümumi təhsil müəssisələrinin birinci siniflərinə elektron qeydiyyat prosesində valideynlərə dəstək məqsədilə Bakı Şəhəri üzrə Təhsil İdarəsi tabeliyində fəaliyyət göstərən məktəblərdə 30 alternativ qeydiyyat mərkəzi istifadəyə verilib.

Xeberler.az məlumat verir ki, birinci siniflərə qəbul prosesi ilə bağlı vətəndaşlar eyni zamanda 5, 6 və 7 saylı ASAN xidmət mərkəzlərinin təhsil xidmətləri bölmələrinə də müraciət edə bilərlər.

Qeydiyyat www.mektebeqebul.edu.az sistemi üzərindən aparılır. Elektron qeydiyyatdan müstəqil şəkildə keçə bilməyən və ya internetə çıxışı olmayan vətəndaşlara yaşadıqları əraziyə ən yaxın alternativ qeydiyyat mərkəzinə müraciət etmələri tövsiyə olunur.

Təhsil müəssisələrindəki alternativ qeydiyyat mərkəzləri Binəqədi rayonu üzrə 83, 217, 297, Nəsimi rayonu üzrə 19, Nizami rayonu üzrə 145, 10, Nərimanov rayonu üzrə 45, Suraxanı rayonu üzrə 279, 280, 114, Qaradağ rayonu üzrə 321, 273, 288, 110, 320, 180, Sabunçu rayonu üzrə 74, 130, 108, 170, Səbail rayonu üzrə 236, Yasamal rayonu üzrə 18, 336, Xəzər rayonu üzrə 88, 156, 234, Xətai rayonu üzrə 257, 165, 261, Pirallahı rayonu üzrə isə 168 nömrəli tam orta məktəbdə fəaliyyət göstərir.

Vətəndaşlar bu mərkəzlərə həftənin I–V günləri saat 10:00-dan 17:00-dək müraciət edə bilərlər. Valideynlərin qeydiyyat zamanı övladlarını özləri ilə gətirmələrinə ehtiyac yoxdur.

Qeyd edək ki, 2026–2027-ci tədris ili üçün birinci siniflərə elektron qeydiyyat prosesinə 1 may saat 11:00-dan etibarən start verilib.