STARTAP AZƏRBAYCAN

Hazırda Bakıda Startap Günləri 2015  başlayıb. 

Xeberler.az-ın məlumatına görə, tədbiri giriş sözü ilə Azərbaycan İnternet Forumunun rəhbəri Osman Gündüz açıb. O, iştirakçıları salamlayaraq, tədbir haqda ətraflı məlumat verib.

Daha sonra rabitə və yüksək texnologiyalar nazirinin müavini Elmir Vəlizadə tədbirin əhəmiyyətindən danışaraq gəncləri bundan faydalanmağa səsləyib:

" Startap Günləri sizə yardım edəcək ki, öz ideyalarınızı layihələşdirib və potensialınızı təqdim edin. Sizin bu gün burada olmağınız və  bu sahəyə maraq göstərməyiniz bizim üçün böyük uğurdur".

O qeyd edib ki, son dövrlərdə Azərbaycanda İKT sahəsində yüksək inkişaf var:

"Sevindirici haldır ki, ali məktəblər bu tədbirdə daha çox təmsil olunmağa çalışır. Bu, gənclərin təşəbbüskarlığından irəli gəlir. Biz bunu yüksək qiymətləndiririk".

Nazir müavini  bildirib ki, Nazirlik həmişə startaplara dəstək verir və bunun üçün müxtəlif müsabiqələr təşkil edir:

"Son vaxtlarda dövlətimiz bu sahə ilə bağlı ciddi və konkret addımlar atır.  Bundan sonra da startaplara dəstək  güclənəcək".

Qeyd edək ki, tədbir çərçivəsində  “Startap Günləri çərçivəsində “Yeni startapların yaranmasında biznes inkubatorların və universitetlərin rolu ” mövzusunda konfrans  keçirilib.

Qafqaz, İqtisadiyyat Universiteti və digər universitetlərin İT nümayəndələri biliklərini gənclərlə bölüşüb. 

Onlar startap yaratmaq istəyən gənclərin suallarını cavablandırıblar.  

Tədbirdə Azərbaycanın ən nüfuzlu universitetlərinin nümayəndələri ilə yanaşı, tələbələr də  iştirak edir. Onlar öz ideyalarını təqdim etməyə hazırlaşır. 

Qeyd edək ki, birazdan gənclər ideyalarını təqdim etməyə başlayacaq. 

Startap Günlərinə Rabitə və Yüksək Texnologiyaları Nazirliyi, İnformasiya Texnologiyalarının İnkişafı Dövlət Fondu, Yüksək Texnologiyalar Parkı, Cybernet, SİNAM, Bakcell şirkətləri və  ATL Group şirkəti dəstək verib.

Məltəm Talıbzadə