E - HÖKUMƏT

Məlumat verdiyimiz kimi, Təhsil Nazirliyi diplomların elektron məlumat bazasını  yaradır. 

Xeberler.az-ın məlumatına görə, hazırda əvvəlki illərin diplomlar da daxil olmaqla bütün diplomların vahid elektron bazası hazırlanır. Yaxın vaxtlarda bütün diplomlar haqqında məlumatlar elektron formada olacaq.

Belə ki, yeni sistem hər bir universitetdə tətbiq olunacaq. Bundan sonra diplomların verilməsini  təhsil müəssisələri təşkil edəcək. Bununla bağlı Təhsil Nazirliyinə  universitetin məzun bazasını yazılı göndərməyə ehtiyac qalmayacaq. Universitetlər özləri məzunların məlumatlarını bazaya daxil edəcəklər. Sistemdə diplomların elektron formasına baxmaq üçün axtarış bölməsinə  şəxsin müxtəlif məlumatlarını, adının, soyadının və ata adının baş hərfini, həmçinin diplomun nömrəsini qeyd etməklə şəxslərə məxsus diplomaları tapmaq mümkün olacaq.

Xeberler.az  bu istiqamətdə universitetlərdə görülən işlərlə maraqlanıb.

Azərbaycan Texniki Universitetindən  Xeberler.az-a verilən məlumata görə, hazırda  diplomlarla bağlı məlumatların sistemə toplanması davam edir. Qeyd edilib ki, bu proses sentyabrın sonuna qədər davam edəcək.

Azərbaycan  İqtisad Universitetindən məsələ ilə bağlı bildirilib ki, hazırda diplomların məlumat bazası tam hazırdır və  2015-cü ilin məzunlarına diplomlar yeni sistemlə veriləcək:

“Təhsil Nazirliyi tərəfindən diplomlar haqqında məlumatları vahid elektron bazaya daxil etmək üçün imkan yaradılır. Tələbələrin bütün məlumatları bazaya toplanır. Təhsil Nazirliyi sistem üzərindən diplomlara nəzarət edəcək. Diplomda digəri işləri isə Universitet həyata keçirəcək.”

Digər Universitetlərdən Xeberler.az -a bildirilib ki, məzunlarla bağlı məlumatları tam olaraq bazaya daxil edilərək Universitetlərin diplomlarının vaxtında hazırlanmasında heç bir problem yoxdur. Bütün məlumatları vaxtında vahid bazaya daxil edən Universitetlər diplom blanklarını dərhal əldə edə bilirlər.

Təhsil Nazirliyi diplomların elektron məlumat bazasının və diplomların mərkəzləşdirilmiş yoxlama portalının hazırlanması üzrə işləri davam etdirir. Hazırda hər bir universitet məlumat bazasını sistemə yükləyir.
Məlumat verdiyimiz kimi  Təhsil Nazirliyi diplomların vahid məlumat bazasının yaradılmasının  saxta diplomların aşkara çıxarılması və verilməsi prosesinin qarşısını almağa imkan verəcəyini bildirmişdi.

Məltəm Talıbzadə