İKT TƏHSİL

Türkiyədə baş verən dəhşətli zəlzələ səbəbindən universitetlərdə təhsil onlayn formaya keçirilib. Türkiyə universitetlərin hamısının yataqxanaları zəlzələdən əziyyət çəkənlərə xidmət edəcək.

"Azərbaycandan da xeyli sayda tələbələr Türkiyədə təhsil alırlar. Bizim qanunvericiliyə görə distant təhsil formasında alınan diplomlar tanınmır. Maraqlıdır ki, hökumətin yeni qəbul etdiyi sənədlərdə də xaricdən distant formada təhsil yolu ilə əldə olunan diplomlar tanınmır. Görəsən Türkiyədə onlayn təhsilə başlayan tələbələrin diplomlarını hökumət tanıyacaqmı, tanıyacaqsa, bu nəyin əsasında olacaq?".

Bunu Xeberler.az-a məsələni şərh edərkən Azərbaycan İnternet Forumunun prezidenti, ekspert Osman Gündüz deyib.

Onun sözlərinə görə, bir neçə gün öncə Nazirlər Kabinetinin qəbul etdiyi yeni Qaydalara –“Xarici dövlətlərin ali təhsilə aid kvalifikasiyalarının tanınması Qaydaları”na görə distant formada alınan diplomların tanınması nəzərdə tutulmayıb:

"Yeni Qaydaların 4-cü maddəsində tələbənin “hər bir tədris ili ərzində təhsilin normativ müddətinin ən azı yarısı qədər təhsil aldığı ölkənin ərazisində olması" və “tədris müddətinin ən azı üçdə ikisində ənənəvi təlim metodlarına əsaslanan formal təhsilin əldə olunması” nəzərdə tutulub. Müxtəlif vaxtlarda təhsil rəsmiləri müxtəlif səbəblərdən, həmçinin distant formada təhsilə nəzarət imkanlarının yetərli olmadığını əsas gətirərək bu təhsil forması ilə alınan diplomları tanımağa ehtiyatla yanaşıblar. Proses xeyli vaxtdır ki, bu qaydada davam edir".

Ekspert qeyd edib ki, baxmayaraq ki, iki il özümüzün təhsil sistemində tədris distant formada aparılıb və hökumət bu qaydada verilən diplomlarımızı tanıyıb. Amma nüfuzlu xarici universitetləri distant bitirənlərin diplomlarını bizim hökumət hələ də tanımır:

"Düşünürəm ki, bu yanaşma qüsurludur. İndiki zamanda təhsil alanları distant formada təhsil almaqdan məhrum etmək, həmçinin öz universitetlərimizə də bu təhsil forması üzrə lisenziya verilməsindən imtina etmək doğru yanaşma deyil. Bununla biz, həm universitelərimizi , həm də yeni ixtisaslara can atan gənclərimizi sanki arxadan tutub saxlayırıq".

Osman Gündüz qeyd edib ki, dünyanın, qloballaşmanın, texnologiyaların və əmək bazarının indiki inkişaf səviyyəsində diplomların tanınmasını üçün tətbiq dilən “təhsil aldığı ölkənin ərazisində məcburi olmaq” prinsipi gənclərimizn və təhsil alanların hüquqlarını xeyli məhdudlaşdırır:

"Sürətlə dəyişən əmək bazarının tələblərinə uyğun olaraq müasir dövrdə yeni ixtisaslara yiyələnməyin, ixtisas artırmağın mühüm əhəmiyyət kəsb etdiyi bir zamanda belə bir “absurd” prinsipin rəhbər tutulması, düşünürəm ki, nəinki gənclərin müasir tələblərə uyğun formalaşmasının qarşısnı alır, eyni zamanda ölkəmizin rəqabətədavamlılığı üçün ciddi problemlər yaradır. Ümid edirəm hökumət, Elm və Təhsil Nazirliyi distant formada alınan diplomların tanınması üçün daha ağlanbatan bir yanaşma tətbiq edəcək".