TEXNOLOGİYA

Sabah Cənubi Koreyada ən rəqəmsal Qış Olimpiadası başlayır.

Xebeler.az xarici mediaya istinadən məlumat verir ki, sabah Qış Olimpiadasınına açılış mərasimi baş tutacaq. Fevralın 25-nə qədər davam edəcək tədbir İT infrastrukturu ilə tarixə düşəcək.

Belə ki, tədbirin təşkili üçün 2 milyard dollar xərclənib.

Ölkə turistlər və tamaşaçıları ilk növbədə texniki yeniliklərlə təəccübləndirməyi planlaşdırır.

Qeyd edilib ki, olimpiadanın keçiriləcəyi Pxençxan şəhərində sürücüsüz avtobuslar işləyəcək. Bu avtobusların daxilində şüşələrin əvəzinə böyük ekranlar quraşdırılıb. Pəncərədən mənzərəyə baxmaq mümkün olacaq. Lakin bu şüşələr faktiki olaraq, böyük planşetlərdir.

Sərnişin bu ekranlar vasitəsilə olduğu yeri dəqiqləşdirə, xəbərləri və ya yarışmanı izləyə bilər. Avtobusda hətta müxtəlif yeməklər sifariş etmək olar. Onlar dronlar vasitəsilə çatdırılacaq. Belə ki, avtobusun marşrutu boyunca xüsusi qəbul stansiyaları yerləşdirilib. Sərnişinlər oradan bağlamaları götürəcəklər.

Oyunlar zamanı yalnız insanlar deyil, robotlar da təhlükəsizliyi təmin edəcəklər. Cənubi Koreyanın ən yaxşı robotları HUBO humanoidləridir. Onlar pilləkənlə irəliləyə, avtomobili idarə edə, qapıları aça, həmçinin insanları səs və zahiri görünüşə görə tanıya bilirlər.

Koreyanın hər yerində virtual reallıq olacaq. Eyni zamanda 32 idman növü virtual reallıqda göstəriləcək. Evdə olan tamaşaçılar xüsusi eynək və ya şlemlər sayəsində olimpiada atmosferinə maksimum yüklənə biləcəklər. Daha bir virtual reallıq texnologiyası – “freeD” müxtəlif nöqtələrdə quraşdırılmış kameralar sayəsində istifadəçiyə bir məqama istənilən bucaqdan baxa bilmə imkanı verir. Bu texnologiyadan, əsasən, futbolda istifadə olunacaq.

Həmçinin koreya dilini bilməyənlər üçün dil baryerini məhv edəcək “GenieTalk” proqramı istifadəyə veriləcək. Koreya, ingilis, yapon, rus, ərəb və alman dillərini dəstəkləyən proqramın bazasında hər dildə 100-dən 800 minə qədər söz vardır.

Cənubi Koreyada keçiriləcək olimpiadada yüksəksürətli İnternet əlçatan olacaq. Belə ki, ölkənin əsas provayderi KT Corporation 5G texnologiyasını sınaqdan keçirir. Bu, LTE-dən min dəfə daha sürətlidir. Məhz yüksəksürətli İnternet VR-translyasiyaların və idman yarışlarının yüksək dəqiqliklə nümayişini təşkil etməyə imkan verəcək.

Onu da bildirək ki, bu il Qış Olimpiadasının kibertəhlükəsizlik və digər İT məsələlərinin həyata keçirilməsində Atos Türkiye şirkəti də iştirak edir.

Şirkətin CEO-su Cüneyt Uslu deyib ki, ilk dəfə bu Olimpiadada bütün texnoloji proseslər Bulud sistemində idarə ediləcək:

“2016-ci ildə Rio Olimpiadaları ilə Atos ilk dəfə bütün tədbirdə Bulud texnologiyasını tətbiq edib.  PyeongChang-da isə bunu daha da genişləndirdik. Bu oyunlarda ilk dəfə olaraq bütün fəaliyyətimizi Bulud- a keçirəcəyik və ən rəqəmsal Olimpiada təşkil edəcəyik”.

Günel