“Azərbaycan Hava Yolları” QSC-yə məxsus “Embraer 190” tipli sərnişin təyyarəsinin Aktau hava limanı yaxınlığında qəzaya uğraması ilə bağlı Beynəlxalq Mülki Aviasiya Təşkilatının 1944-cü il Beynəlxalq Mülki Aviasiya haqqında Çikaqo Konvensiyasının 13 saylı Əlavəsinin tələblərinə uyğun aparılan araşdırmanın ilkin
hesabatı dərc olunub.
Xeberler.az bildirir ki, məsələyə Azərbaycan İnternet Formunun Prezidenti, ekspert Osman Gündüz münasibət bildirib.
Ekspertin sözlərinə görə, Qazaxıstan tərəfin hazırladığı ilkin Hesabatda təyyarənin Rusiya HHM tərəfindən vurulması faktı yoxdur. Kənar təsirlərdən, yad cisimlərdən söhbət gedir:
"Görünür ki, Qazaxıstan üçün də çətin olub. Hesabatda ancaq "quş sürüsü", "qaz balonu" iddiaları da təsdiqlənməyib.
Maraqlıdır ki, belə bir hesabat dərc olunan anda bizim mediada AZAL-ın təyyarəsinin Rusiya HHM tərəfindən, Pansir-S1 ilə vurulması haqqında Azərbaycan hökumətinə istinadla Röyters-in məlumatı açıqlanıb.
Görəsən eyni anda bu məlumatı açıqlamaq hansı qüvvələrə lazım olub".
Osman Gündüz bildirib ki, bu nəhənglikdə müttəfiq ölkə üzrxahlıq etmədi, məsuliyyəti üzərindən atdı:
"Belə olan halda kompensasiya, bu cinayəti edənlərin cəzalandırılmasını da gözləməyə dəyməz.
Görünən, diqqət cəlb edən bu oldu ki, Prezident son ana qədər müttəfiq ölkənin üzrxahlığı və etirafı üçün mübarizə apardı, ümid etdik ki bu baş tutacaq. Lakin görünür ki, hesablamalar doğru olmayıb".
Belə olan halda nə etmək lazımdır?
Ekspert qeyd edib ki, beynəlxalq qurumlara üz tutmaq, beynəlxalq müstəvidə ədaləti axtarmaq məntiqli olardı:
"Beynəlxalqda da aləm qarışıb, ədaləti güc əvəzləyib. İstənilən halda başqa yol, başqa seçim bizə qoymayıblar. Qazaxıstanla da mübarizə aparmağın yeri yoxdur.
Ümid edirəm baş verənlərdən cəmiyyət və dövlət olaraq ibrət dərsləri götürə biləcəyik".
