TƏHLİL

TFB ilə Google əməkdaşlığı da davam edir

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

“Bakı şəhərinin ictimai nəqliyyat məlumatlarının Google Maps ilə   paylaşımındakı problemlə bağlı bir müddət öncə yazmışdım. Avtobusların hərəkəti ilə bağlı BNA məlumatlarını əldə edib Google ilə bölüşən Transit For Baku qurumu son zamanlar bu məlumatları əldə etməkdə çətinlik çəkdiyini bildirmişdi. Problem ciddiləşdiyindən Google bu məlumatları Google Maps-dən yığışdırmışdı.

İndi görünür ki, Google Maps artıq Azərbaycanla bağlı bu tip məlumatları yeniləyib. Bu resursdan görünür ki, Google artıq məlumatları birbaşa BNA-dan alır, BNA -nın rəsmi saytına və telefon nömrəsinə istinad olunur. Yəni, bu o anlama gəlir ki, BNA artıq rəsmi olaraq Google Transit Partner olub. Bir müddət öncə yazdığım aşağıdakı statusda qeyd etmişdim ki, problemin mümkün həlli yollarından biri də elə bu görünürdü.

Amma dərhal da qeyd etmək istərdim ki, BNA Google üçün təqdim etdiyi bu məlumatları emal oluna biləcək səviyyədə, açıq məlumat formasında da paylaşmalıdır ki, maraqlı tərəflər ondan istifadə edə bilsin. Yeri gəlmişkən, indiyədək bu xidməti reallaşdıran (buna görə o komandaya da təşəkkür düşür), məlumatları Google Maps-a təqdim edən TFB qurumu da, görünür ki əməkdaşlığı davam etdirəcəklər.

Belə ki, Google Maps-də digər ictimai nəqliyyat növü üzrə - metro ilə bağlı məlumatları sorğuladıqda mənbə olaraq BNA ilə bərabər TFB şirkətinin də adı görünür. Bu o deməkdir ki, metro məlumatlarını Google TFB dən almaqda davam edir.

Beləliklə :

Avtobus marşrutları ilə bağlı məlumatı Google bundan sonra BNA-dan əldə edəcək.

Metro məlumatlarını isə TFB qurumu Google Maps-a təqdim etməyi dayandıranadək, Metropoliten və ya BNA bu məlumatlara da iddia etməyənədək TFB ilə Google əməkdaşlığı da davam edəcək”.