TƏHLİL

“Google Maps” resursunda Azərbaycanın ictimai nəqliyyat sistemi ilə bağlı məlumatlar silinib.

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz “Facebook” səhifəsində paylaşım edib.

“Bununla bağlı uzun illər bu işlə könüllü məşğul olan “Transit For Baku” qrupu məlumat açıqlamışdı.

Ötən ayın əvvəli bu problemlə bağlı yazmışdım.

Artıq bu məlumatlar Google Maps-dən yığışdırılıb. Bu tip məlumatlar hazırda yalnız BNA-nın alo141.az saytında və mobil versiyada mövcuddur.

Düşünmək olar ki, TFB könüllü qurumu zəruri məlumatları emal oluna biləcək səviyyədə BNA-dan əldə etməkdə çətinlik çəkirlər.

Digər üsullarla bu məlumatları əldə edib yenidən emal edərək Google resursuna inteqrasiya etmək isə təbii ki əlavə resurslar tələb edir. Görünür ki, qurumun BNA ilə partnyorluğunda problemlər yaranıb.

Əlbəttə, global xəritələrdən bu tip məlumatların yığışdırılması ölkəmiz üçün arzuolunan deyil.

Gərək BNA zamanında bu məsələyə reaksiya verəydi ki, məlumatlar silinəcək səviyyəyə çatmayaydı.

Düşünürəm ki, Azərbaycanın ictimai nəqliyyat məlumatlarının Google Maps üzərindən verilməsinin davam etdirilməsi üçün BNA tez bir zamanda aşağıdakı variantlardan birində seçim etməlidir :

1. BNA bir çox ölkələrdə olduğu kimi ictmai əhəmiyyət kəsb edən məlumatları özü Google Maps-a təqdim etməlidir. Bunun üçün qurum Google şirkəti ilə əməkdaşlıq etməli və xidməti təqdim edən strukturlarla partnyorluq müqaviləsi imzalamalıdır

2. BNA “Transit For Baku” könüllü komandası ilə müqavilə imzalamlı, adı çəkilən məlumatların emal oluna biləcək səviyyədə TFB qurumuna verilməsi təmin edilməlidir

Yeri gəlmişkən, əslində bu tip problem digər dövlət qurumlarına da xasdır.

Söhbət açıq məlumatlardan, emal oluna biləcək səviyyədə məlumatların dövlət qrumları tərəfindən açıqlanmasından gedir.

Məsələn, BNA hansısa marşrut dəyşikliyini, hansısa xəbərin -press relizin içərisində deyil, emal oluna biləcək səviyyədə açıqlamalıdır.

Təəssüf ki, bizdə hələlik Açıq Məlumatlar haqqında qanun da qəbul edilməyib.

Hansı ki, bu qanun, o cümlədən, Açıq məlumatlar portalı (opendata.az) Açıq Hökumətin əsas tərkib hissəsidir. Bu portalda isə hələlik çox "kasıbçılıqdır".

Hələlik dövlət qurumları da, güman ki zəruri resurslar ayrılmadığından, məlumatları emal oluna biləcək səviyyəyə gətirmək və onu açıqlamaq işinə elə könüllü kimi yanaşırlar.”