"İnnovasiya sözünün mahiyyəti ilə bizdəki innovasiya işlərinin sürəti arasındakı ziddiyyət.
1. 2018-ci ilə Prezidentin fərmanı ilə NRYTN tabeliyində İnnovasiya Agentliyi yaradılıb. 3 il keçməsinə baxmayaraq hələlik qurum fəaliyyətə başlaya bilməyib.
Yəni, gözəl ofis, gözəl xidməti maşınlar, kondisionerli və isti kofeli otaqlar olsa da ekosistemə töhfə verəcək fəaliyyət ortada yoxdur.
2. 2019-cu ilin yanvarında qəbul edilən Prezident fərmanı ilə 5 ay ərzidndə beynəlxalq məsləhətçi qurum da cəlb edilmklə "İnnovasiyaların inkişafı Strategiyası" hazırlanmalıydı. Beynəlxalq qurumun pulu mənimsəyib aradan çıxdığı da bildirilir.
Amma real vəziyyət odur ki, 2 ildən çoxdur ki, bu sənədin layihəsi ortaya çıxarılmayıb.
3. 2019-cu ildə Prezident Administrasiyasının innovasiyalar sahəsini kurasiya edən bölməsində bu sektorun inkişafı ilə əlaqəli Yol Xəritəsi hazırlanırdı. Xeyli təkliflər toplandığı bildirilirdi. Hələlik belə bir sənəd açıqlanmayıb.
İnnovasiyalar sahəsi elədir ki, onun inkişafının, adında innovasiya sözü olan sənədlərin nəinki bir neçə il, heç bir-iki gün də ləngiməyi yolverilməzdir.
Yeri gəlmişkən, bu sənədlərin qəbul edilməməsi o demək deyil ki, bu sahədə heç bir addım atılmayıb.
Prezidentin innovasiyaların inkişafı il bağlı adı çəkilən fərmanının icrası istiqamətində bir çox sahələrdə, xüsusilə ali təhsil sistemində müəyyən addımların atıldığı müşahidə olunur.
Amma görünən odur ki, ölkəmizdə innovasiyalar sahəsində adı çəkilən konseptual sənədlərin, səlahiyyətli qurumların ləngliyi ekosistemin inkişafına ciddi zərbə vurur.
Qonşu ölkələrin təcrübəsinə qısa olaraq nəzər salanda görmək olur ki, onlar böyük maliyyə resurslarını , startaplar üçün milyonlarla sərmayəni məhz çevik hüquqi islahatlar, vençur maliyyələşmə, münbit hüquqi şərait nəticəsində cəlb edə biliblər.
Ümid edirəm Prezident Administrasiyasının müvafiq bölməsi, aidiyyatı qurumlar innovasiya və startap ekosistemdəki durğunluğu aradan qaldırmaq üçün səylərini gücləndirəcəklər".
Azərbaycan İnternet Formunun Prezidenti Osman Gündüz
