Ekspert: Yeni yaranan Agentlik dövlət və özəl sektor üçün bərabər şərait yarada biləcəkmi ?

12-10-2021 / 14:50
"Prezidentin rəqəmsallaşma, rabitə və informasiya texnologiyaları sahəsində tənzimləmə ilə bağlı verdiyi fərmanda diqqət cəlb edən bəzi məqamlar var".
 
Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz, Prezident İlham Əliyevin rabitə və informasiya texnologiyaları sahəsində tənzimləmə ilə bağlı verdiyi fərmanı şərh edərkən deyib.
 
Ekspertin sözlərinə görə, uzun illər bu sektorda tənzimləmə həmişə elə Nazirliyə məxsus olub. Yəni, Nazirlik özünün də subyekt olduğu İKT bazarını tənzimləyirdi. Nazirlikdə tənzimləmə adında bir şöbə olub və on illər ərzində bu şöbə də daha çox dövlət operatorları üçün üstün şərait yaratmaqla məşğul olub.
 
Odur ki, az qala yüzdən çox yaşı olan Azərbaycan telekommunikasiya sektorunda ayrıca tənzimləyici Agentliyin yaranması olduqca müsbət addımdır.
 
"Düşündürücü məqam odur ki, Fərmana görə Agentliyin rəhbərini Nazir təyin etməlidir. Daha ideal variant o ola bilərdi ki, bu Agentliyin rəhbəri Prezident tərəfindən təyin edilsin.
 
Çünki uzun illər oturuşmuş ənənəni dəyişmək, dövlət və özəl üçün bərabər şərait yaratmaq Agentlik üçün elə də asan olmayacaq".
 
Görəsən yenidən dövlət sektoru üçün daha münbit və daha üstün şərait yaradıla bilərmi ?
 
Osman Gündüz suala cavab olaraq bildirib ki, narahatlıq üçün hələlik elə də ciddi əsaslar yoxdur.
 
"Çünki, bu cür narahatlıqları yalnız və yalnız Agentliyin Nizamnaməsi əsasında aradan qaldırmaq olar. Nizamnaməni isə Prezident təsdiq edəcək. Ümid edirəm Nizamnamədə Agentliyin müstəqilliyini artıracaq, qərarlarının gücünü, təsirini qüvvətləndirəcək amillər özünə yer tapacaq".
 
Bu Fərmandan sonra radiotezlik spektri sahəsində 3 qurum fəaliyyət göstərəcək, Nazirlər Kabineti yanında Radiotezliklər Komissiyasının ləğvindən sonra yaradılan Dövlət Radiotezliklər Komissiyası, NRYTN-nin Dövlət Radiotezliklər İdarəsi və yeni yaranan İKT Agentliyi.
 
Ekspert bildirib ki, bu fərmanla radiotezlik sahəsində əsas tənzimləmə siyasəti Agentliyə veriləndən sonra Komissiyanın nə iş görəcəyi də suallar yaradır. Dövlət Radiotezliklər Komissiyanın ləğv edilməsi də yaxınlarda gözlənilən ola bilər.
 
Osman Gündüzün sözlərinə görə, daha bir diqqət çəkən məqam, bu gün verilən Fərmanla ölkə üzrə genişzolaqlı şəbəkədən istifadə sahəsində fəaliyyət göstərən sahibkarlıq subyektlərinin iştirakının regionlar üzrə genişləndirilməsi və istehlakçıların genişzolaqlı internetlə təmin olunması istiqamətində zəruri tədbirlər görülməsinin nəzərdə tutlmasıdır. Artıq RİN bu istiqamətdə işlərə başlayıb. Hökumətin də bütövlükdə bu sahəyə diqqəti düşünürəm ki, Nazirin 2 il ərzində ölkədə internet problemini həll edəcəyi ilə bağlı verdiyi sözü daha da qüvvətləndirəcək.
 
"İki-üç il ərzində öz fəaliyyətini qura bilməyən NRYTN-nin İnnovasioyalar Agentliyinin ləğv edilib onun əsasında İnnovasiya və Rəqəmsal İnkişaf Agentliyinin yaranması da ümid edirəm ki startap və innovasiya sektorundakı durğunluğu aradan qaldıra biləcək. Yeni Agentlik daha çox sektorda bazar iştirakçısı olaraq deyil, tənzimləyici qurum olaraq fəaliyyət göstərəcək".

ŞƏRHLƏR






sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.