TƏHLİL VƏ RƏYLƏR

Xeberler.az olaraq Azcloud Hackaton 2019 müsabiqesi ilə bağlı xəbəri oxuculara çatdırmışdıq. Indi isə müsabiqə və digər məsələlər ilə bağlı Azərbaycan İnternet Formunun Prezidenti, ekspert Osman Gündüzün açıqlamasını təqdim edirik:

"Bir müddət öncə Nəqliyyat Rabitə və Yüksək Texnologiyalar Nazirliyinin (NRYTN) nəzdində İnnovasiya Agentliyi yaradılıb və bu yaxınlarda Prezidentin sərəncamı ilə yeni rəhbəri də təyin olunub.

Bundan sonra NRYTN-nin innovativ fəaliyyətində İnnovasiya Agentliyinin adına daha tez-tez rast gələcəyimizi gözləyirdik.

Qəribədir ki, hazırda Nazirlikdə bu istiqamətdə öndə gedən qurum İnnovasiya Agentliyi deyil, NRYTN-in digər qurumu – AzİnTelecom-dur.

Anlaşılmazdır ki, milyonlarla vəsait xərclənərək yaradılan nəhəng Data Mərkəzin operatoru olan, Azercell kimi nəhəng qurumun təsisçisi olan, ölkənin bütün beynəlxalq trafikinə nəzarət edən bu dövlət şirkəti özünə dəxli olmayan tədbirlər keçirməklə, cari xarakterli bəsit işlərlə məşğuldur. Hansı ki, bu işləri görəcək qurum da Prezident fərmanı ilə elə NRYTN-nin nəzdində yaradılıb.

Eyni zamanda absurd bir vəziyyət də ondan ibarətdir ki, bu dəfə AzİnTelecom 70 nəfərlik AZCLOUD Hackathon tədbrini keçirmək üçün 70 min nəfərlik Bakı Olimpiya Stadionunu icarəyə götürüb.

Bəlkə də dünyada eventlər tarixində bu dərəcə anormal bir vəziyyət olmayıb. Ölkəmizin diskoteka keçirmək üçün yüksək səviyyəli zalları mövcud olduğu halda AzİnTelecom –un 70 minlik stardionda 70 nəfərlə dsikoteka təşkilini necə izah etmək olar görəsən ?

Bəlkə vəsait o qədər çoxdur ki onu mütləq harasa xərcləmək (silmək) lazımdır ?
Gəlirin çox olması da inandırıcı görsənmir. Çünki daha bir absurd vəziyyət ondan ibarətdir ki, bu cür resurslara malik dövlət şirkətinin ötən il gəlirləri 26 % aşağı düşüb. Daha doğrusu o ola bilərdi ki, AzİnTelecom Data Mərkəzin operatoru olaraq xidmətlərin səviyyəsini qaldıraydı.

Bu nəhənglikdə Data Mərkəz fərqindədirmi ki, ölkənin sayılan dövlət qurumları öz məlumat bazalarının Backup-nı hələ də xarici serverlərdə saxlayırlar. Nə üçün özəl sektor məlumat bazalarını yerli Data Mərkəzdə deyil xarici resurslarda saxlayır ?
Nə üçün heç bir qurum AzİnTelecom-a gəlmək istəmir? Gələnlər də inzibati resurslarla gətirilir. 

AzİnTelecom daha əhəmiyyətli və özünə birbaşa dəxli olan bu sualların cavabı üzərində düşünsə daha doğru olardı.

Ümumiyyətlə müşahidə etdikdə görmək olar ki, Nazirlikdə səlahiyyət bölgüsü, vəzifələrin icrası sahəsində də anlaşılmazlıq var. Startpalarla bağlı regionada tədbir təşkil edilib. Məntiqlə bunu da sahə üzrə Nazirliyin səlahiyyətli qurumu olan İnnovasiya Agentlıiyi etməlidir. Amma diqqət etdikdə görürük tədbirin təşkilatçıları arasında ümumiyyətlə bu qurumun adı yoxdur.

Düşünürəm ki, NRYTN tədbir xatirinə tədbir keçirməkdənsə Prezident fərmanı ilə yaradılan İnnovasiya Agentliyi çərçivəsində strateji plan hazırlayıb, strateji hədəflər götürüb, Prezidentin innovasiyaların inkişafı haqqında Fərmanına uyğun olaraq sistemli formada fəaliyyət göstərmək daha məntiqli olardı.

Qəribədir ki, İnnovasiya Agentliyinin rəhbərinin təyin olunması haqqında Prezident sərəncamını da Prezidentin rəsmi saytında tapa bilmədim. Bilmirəm təsadüfdür , yoxsa bu da Nazirlikdəki anlaşılmazlıqlarla bağlıdır".