RƏQƏMSAL DÜNYA

Azərbaycanda qısa müddətdə geniş istifadəçi bazası qazanan m10 elektron pulqabısı ətrafında baş verən son hadisələr fintex sektorunda risklərin idarə olunması məsələsini yenidən gündəmə gətirib.

Xeberler.az məlumat verir ki, Azərbaycan İnternet Forumunun Prezidenti, ekspert Osman Gündüz məsələyə münasibət bildirib.

O qeyd edib ki, m10 platforması PashaPay elektron pul təşkilatı tərəfindən idarə olunur və şirkətin 100 faiz payçısı Kapital Bank-dır. Son illər tətbiqin sürətli böyüməsi və funksional imkanlarının genişlənməsi onu bazarın əsas oyunçularından birinə çevirib.

Ekspertin sözlərinə görə, son günlər bəzi m10 istifadəçiləri hesablarında xarici mənşəli merchant-lardan izahı olmayan vəsait axınları müşahidə etdiklərini qeyd ediblər. Çox sayda istifadəçinin hesabında gözlənilmədən böyük məbləğlərin görünməsi səbəbindən hesablar müvəqqəti dondurulub və əməliyyatlara məhdudiyyətlər tətbiq olunub.

PashaPay MMC məsələ ilə bağlı açıqlama verərək qanunsuz köçürmələrin mövcudluğunu dolayısı ilə təsdiqləyib, istifadəçi vəsaitlərinin təhlükəsizliyinin təmin olunduğunu və sistemin bərpa edildiyini bildirib. Bununla yanaşı, sosial media və mediada yayılan müzakirələrdə hadisənin mümkün böyük məbləğli qanunsuz dövriyyə ilə əlaqəli ola biləcəyi iddiaları irəli sürülüb.

Osman Gündüz qeyd edib ki, bu, oxşar problemlərlə bağlı ilk hadisə deyil. Onun sözlərinə görə, Mərkəzi Bank daha əvvəl PashaPay-ə qarşı çirkli pulların leqallaşdırılmasına qarşı mübarizə, fərdi məlumatların qorunması və nəzarət mexanizmləri ilə bağlı tədbirlər tətbiq edib. Son hadisə ilə əlaqədar cinayət işinin başlanması və həbslərlə bağlı məlumatlar yayılsa da, hələlik rəsmi açıqlama verilməyib.

Ekspert hesab edir ki, baş verənlər texniki nasazlıqdan daha çox risklərin idarə olunmasında problemlərə işarə edir. O, m10-un Binance kriptobirjası ilə inteqrasiyasını da xatırladaraq, kripto, xarici merchant və elektron pulqabı zəncirinin yüksək riskli sahə olduğunu vurğulayıb.

Onun fikrincə, belə hallar elektron pulqabıları və fintex platformalarına olan etimadı azalda, bank sektorunu reputasiya baxımından risk altına sala bilər. Ekspert təhlükəsizlik standartlarının vahid və məcburi olmasının, bankların isə sahib olduqları fintex platformalarına görə daha ciddi məsuliyyət daşımasının vacibliyini qeyd edib.