"İndi də NVİDİA-nın Ermənistana süni intellektin inkişafı üçün 0.5 milyard deyil, 1.5 milyard $ investisiya yatıracağı bildirilir".
Xeberler.az bildirir ki, bunu Azərbaycan İnternet Formunun Prezidenti, ekspert Osman Gündüz deyib.
Ekspert bildirib ki, Ermənistan süni intellektin inkişafı üçün NVIDIA ilə 500 milyon dollarlıq müqavilə imzalamışdı:
"2026-cı ildə NVIDIA Ermənistanda Blackwell GPU-ları ilə təchiz olunan və 100 meqavatdan çox gücə malik Süni İntellekt Mərkəzi quracaq. Bu layihənin məqsədi Ermənistanı süni intellekt üzrə qabaqcıl mərkəzə çevirmək, yeni texnologiyalarla yerli iqtisadiyyatı canlandırmaq, innovasiya mühitini gücləndirmək və qlobal bazara çıxış üçün dayanıqlı platforma formalaşdırmaqdır.
Maraqlıdır ki, indi bu əməkdaşlığın daha da dərinləşməsilə bağlı məlumatlar yayılır. Artıq süni intellekt sahəsində bu dünya nəhəngi şirkətin Ermənistana 1.5 milyard $ investisiya yatıracağı ilə bağlı açıqlamalar gözə dəyir. Bu Ermənistan üçün, region üçün çox böyük investisiyadır, süni intellektin inkişafı üçün hədsiz böyük imkandır".
Osman Gündüz düşünür ki , bütün bunlar reallaşsa Ermənistanın regional rəqabətdə önə çıxmaq şansı birmənalı olacaq:
"Ermənistan məhz bu sektoru inkişaf etdirməklə, NVİDİA ilə birbaşa əməkdaşlıqla iqtisadi imkanlarını qısa zamanda gücləndirmək xətti götürüb.
Həm də, dolayısıyla bütün bunlar Ermənistanı investorlar, startaplar və qlobal şirkətlər üçün, beynəlxalq universitetlər üçün daha cəlbedici texnoloji mərkəzə çevirə biləcək.
Açıq desəm, büdcəsini, iqtisadi vəziyyətini qısa zamanda gücləndirən Ermənistanda güman ki, revanş meylləri də güclənəcək, bizə olmasa da, gələcək nəsillərə problem yarada biləcək".
Ekspertin sözlərinə görə, Azərbaycanda son illərdə süni intellekt sahəsində müəyyən canlanma var. Strategiya qəbul edilib. İnfrastruktur layihələri icra olunur. Dövlət tərəfindən müəyyən resurslar ayrılır. Amma bunlar çox məhddudur:
"Görünən odur ki, hədsiz çox ləngimələr, pərakəndəlik var bu sektorda. Sanki hər bir dövlət qurumu, hər bir şirkət özü üçün süni intellekt sahəsində nəsə edir. Dövlət sektorunun biznesə dəstək vermək əvəzinə özünün nəsə etmək istəkləri daha çox müşahidə olunur.
Kordinasiyasızlıq, resursların məhdudluğu, bəsit layihələr üstünlük verilməsi isə ciddi narahatçılıq doğurur.
Ümid edirəm sektorun inkişafına cavabdeh olanlar, həm də milli təhlükəsizliyə cavabdeh qurumlarımız və qərar qəbul edənlərimiz də bunların, regionda baş verənlərin fərqindədir".
