"Azərbaycanda süni intellekt ekosistemin inkişafı üçün strateji əhəmiyyət daşıyan GPU əsaslı iki Superkompüter Mərkəzinin yaradılması prosesi gedir.
Xatırladıram ki, c dəstəyi ilə Caspel şirkəti tərəfindən qurulan ilk Superkompüter Mərkəzinin artıq hazır olduğu bildirilir".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, şirkət ən çətin mərhələni - NVİDİA H200 çiplərinin ABŞ-dan lisenziya əsasında ölkəyə gətirilməsi mərhələsini başa çatdırıb:
"Bu Superkompüter Mərkəzi İqtisadiyyat Nazirliyinin İnformasiya Texnologiyaları və Məlumat İdarəetmə Mərkəzinin inzibati binasında yerləşəcək.
DELL texnologiyası əsasında qurulacaq Mərkəz əsasən dövlət qurumlarının süni intellekt layihələri üçün nəzərdə tutulub. Layihəyə 10 milyon manat dəyərində maliyyə ayrılıb. Yaxın günlərə açılışı nəzərdə tutulub".
osman Gündüz bildirib ki, 2-ci Superkompüter Mərkəzini quracaq şirkət də bəlli olub:
"Bununla bağlı AZCON tabeliyində AzInTelecom MMC ilə “İnnovativ Layihələr Mərkəzi” şirkəti arasında 7 milyon manatlıq müqavilə bağlanıb.
“İnnovativ Layihələr Mərkəzi” şirkəti bir neçə data infrastrukturla bağlı layihələr üzrə də AzİnTelecom-la əməkdaşlıq edib.
İkinci Superkompüter Mərkəzi isə Süni İntellekt Strategiyasında nəzərdə tutulduğu kimi Rəqəmsal İnkişaf və Nəqliyyat Nazirliyi tərəfindən dəstəklənir və həm də İRİA və AI Lab-ın süni intellekt layihələrinin həyata keçirilməsi üçün nəzərdə tutulub.
Bu Mərkəz əsasən startaplar, innovasiya subyektləri və biznes layihələri, həmçinin dövlət layihələri üçün nəzərdə tutulur.
Burada Lenovo texnologiyası və NVIDIA H200 GPU çipləri istifadə ediləcək.
Hələlik bu çiplərin ABŞ-dan lisenziyalarının alınması və ölkəyə gətirilməsi ilə bağlı məlumatlar verilməyib".
Ekspert qeyd edib ki, hazırda hər iki mərkəzdə xidmət tariflərinin formalaşdırılması mərhələsi gedir. Bu tariflərin əlçatan olması isə süni intellekt sahəsində geniş istifadəni stimullaşdırmaq baxımından böyük əhəmiyyət kəsb edir:
"Bu mərkəzlərin formalaşması ölkədə süni intellekt ekosistemin inkişafı baxımından mühüm əhəmiyyət kəsb edir.
Bunların sayəsində yerli süni intellekt layihələri xarici resurslara ehtiyac duymadan ölkə daxilində inkişaf edə biləcək. Dövlətə məxsus data üçün daha təhlükəsiz mühit formalaşacaq.
Eyni zamanda, bu infrastruktur Azərbaycanın regionda süni intellekt üzrə rəqabətə davamlılığını təmin edəcək".
