"Prezident tərəfindən təsdiqlənmiş “Azərbaycanın Süni İntellekt Strategiyası” ölkəmizdə rəqəmsal inkişafın və yeni texnologiyaların geniş tətbiqini sürətləndirmək üçün mühüm bir mərhələdir. Strategiyanın əsas məqsədlərindən biri – Süni intellekt üzrə istedad və bacarıqların təkmilləşdirilməsidir".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, artıq bu sahədə kadr potensialının gücləndirilməsi üçün konkret addımlar atılır. Strategiyada bu məqsədlə Süni İntellekt Akademiyasının yaradılması nəzərdə tutulub.
Görəsən hansı qurum bunu yaradacaq?
Suala cavab olaraq Osman Gündüz bildirib ki, görmək olur ki, belə bir qurum formalaşdırılıb:
"Strategiyanın bu bəndinin icrası üçün əsas məsul qurum Rəqəmsal İnkişaf və Nəqliyyat Nazirliyidir. Nazirliyin 3 il bundan öncə fəaliyyətə başlayan Süni İntellekt Laboratoriyasının (Aİ Lab) resurslarından görsənir ki, Aİ Academy (
aiacademy.az) Nazirliyin təşəbbüsü ilə artıq fəaliyyətə başlayıb.
Aİ Lab-ın ən önəmli təşəbbüslərdən biri də elə yeni yaradılan tədris mərkəzi - AI Academy-dir. Burada tam ödənişsiz şəkildə dərslərin təşkili, yüksək ixtisaslı yerli və beynəlxalq mütəxəssislərlə əməkdaşlıq nəzərdə tutulub".
Qeyd edək ki, AI Academy, İnnovasiya və Rəqəmsal İnkişaf Agentliyi və xarici partnyorların iştirakı ilə dərslərə başlamaq üçün elanlar verilib.
Tədris proqramına hələlik aşağıdakı istiqamətlər daxil edilib:
• Süni intellekt üçün riyaziyyat
• Süni intellekt mühəndisliyi
• Menecerlər üçün süni intellekt
Ekspert bildirib ki, Süni İntellekt Strategiyasının hazırlanmasında yaxından iştirak edən AI Lab hazırda AzİnTelecom tərəfindən elan edilmiş və ölkə üzrə Süni İntellekt Laboratoriyasının qurulması ilə bağlı tender layihəsinin də əsas sifarişçisidir:
"Bu laboratoriyanın məqsədi, ölkədə süni intellekt həllərinin yaradılması və inkişaf etdirilməsi üçün güclü hesablama və texnoloji infrastrukturun - Superkompüter Mərkəzinin qurulmasıdır. Bu resursun gələcəkdə həm dövlət, həm akademik və özəl sektor, həm də startaplar tərəfindən istifadə ediləcəyi gözlənilir.
Xatırladıram ki, bu, artıq ölkədə ikinci bir Superkompüter Mərkəzidir. Bundan öncə də İqtisadiyyat Nazirliyi tərəfindən elan edilən tenderin qalibi olan Caspel şirkəti hazırda böyük bir Superkompüter Mərkəzinin qurulmasını başa çatdırmaq üzrədir".
Osman Gündüzün sözlərinə görə, eyni zamanda müşahidələr göstərir ki, özəl sektor da RİNN və universitetlərlə yanaşı süni intellekt sahəsində kadrların hazırlanmasında aktiv fəaliyyət göstərirlər.:
"Düşünürəm ki, RİNN, Elm və Təhsil Nazirliyi və digər əlaqəli qururmların bu tip peşəkar mərkəzlərə də dəstək verməsi, xarici partnyorların bu qurumlarla da əməkdaşlığının təşkilinə köməklik göstərməsi vacibdir və bu çox faydalı olardı.
Bütün bu addımlar təqdirəlayiqdir və düşünürəm ki, Azərbaycanın regional süni intellekt mərkəzinə çevrilməsi yolunda strateji və praktiki irəliləyişlərdir".
