Qazaxıstanın süni intellekt planı nəhayət ki, işə düşdü: Şeyx və NVİDİA Astanadadır
"Ötən günlər Abu Dabi vəliəhdi Şeyx Xalid bin Məhəmməd bin Zayed Əl Nəhya Qazaxıstana rəsmi səfər edib, Prezident Tokayevlə görüşüb".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert qeyd edib ki, görüş çərçivəsində çoxsaylı sənədlər, o cümlədən BƏƏ-nin süni intellekt sahəsində ixtisaslaşmış G42 holdinqinin törəmə şirkəti olan Presight ilə iki nəhəng layihə, "Ağıllı şəhər" və Superkompüter layihələri üzrə müqavilələr imzalayıblar. Astana üçün nəzərdə tutulan “Ağıllı şəhər” layihəsinə 190 milyon $ investisiya yatırılacaq:
"Anlaşma çərçivəsində iki ədəd NVİDİA H200 əsaslı superkompüter klasterin Qazaxıstana tədarük olunması və süni intellekt və data emalı üçün böyük bir hesablama mərkəzi yaradılması nəzərədə tutulub.
Həmçinin Presight şirkəti Astanada nümayəndəliyini açıb və Mərkəzi Asiya üzrə böyük layihələr həyata keçirməyi hədəfləyib.
Xatırladıram ki, belə bir anlaşma bir il bundan öncə imzalansa da Qazaxıstan indiyədək bu NVİDİA çiplərini ABŞ-ın tətbiq etdiyi lisenziya məhdudiyyətləri səbəbindən əldə edə bilmirdi".
Osman Gündüzün sözlərinə görə, Şeyxin Qazaxsıtana səfəri çərçivəsində belə bir anlaşma isə artıq onu göstərir ki Qazaxıstanın bu çipləri əldə etməsindəki çətinliklər arxada qalıb:
"Bu günlərdə belə bir məlumat da yayılmışdı ki, ABŞ 500 000 NVİDİA çiplərinin BƏƏ-yə ixracına icazə verib. Bunun bir hissəsi də Presight şirkətinə veriləcək.
Güman ki ABŞ texnologiyalar sahəsində Yaxın Şərqdə möhkəmlənmək, Çinin təsirlərini bu regionda azaltmaq üçün bu addımları atır.
Düşünürəm ki, bu anlaşmalar Qazaxıstanın Mərkəzi Asiyada, ümumiyyətlə regionda süni intellekt və texnologiyalar sahəsində mövqeyini xeyli gücləndirəcək.
Yeri gəlmişkən həmin bu Presight şirkəti ilə SOCAR-ın da əməkdaşlıq müqaviləsi var. Bu müqavilə Azərbaycanda süni intellekt əsasında Ağıllı Qaz Şəbəkəsinin İdarəetmə Sisteminin yaradılamsını, şəbəkənin modernləşdirilməsini, texnologiyaların tətbiqi ilə qaz itkilərinin və emissiyaların azaldımasını nəzərdə tutur. Layihənin ümumi dəyəri 480 milyon dollar təşkil edir".
Ekspert xatırladıb ki, Azərbaycanda da süni intellekt infrastrukturunun inkişafına yönələn iki Superkompüter layihəsi reallaşmaqdadır:
"İqtisadiyyat Nazirliyinin dəstəyilə, CASPEL şirkəti tərəfindən qurulan 10 milyonluq Superkompüter infrastrukturunun yaxın günlərdə açılışı nəzərədə tutulur. Əsasən dövlət və elmi tədqiqat sektoruna xidmət göstərəcək.
RİNN-in və AzİnTelecom-un dəstəyilə, hələlik adı açıqlanmayan digər İT şirkətimiz tərəfindən qurulan 7 milyonluq süni intellekt infrastrukturun nə zaman hazır olacağı açıqlanmayıb. Əsasən biznes, startap və innovasiya ekosistemə yönəlib".
