E - HÖKUMƏT

"Şəffaflıq Azərbaycan” Korrupsiyaya Qarşı Mübarizə İctimai Birliyi "Fərdi yaşayış evlərinin qeydiyyatı sahəsində mövcud problemlər və onların həlli yolları” mövzusunda dəyirmi masa keçirilib.

Xeberler.az-a qurumdan verilən məlumata görə, görüşdə bir sıra dövlət qurumlarının, vətəndaş cəmiyyətlərinin nümayəndələri, həmçinin "Elektron Hökumət” portalının nümayəndəsi iştirak edib.

Əmlak Məsələləri Dövlət Komitəsinin elektron xidmətlərinin monitorinqini aparan qurum aşağıdakı nəticələri ortaya qoyub:

Nazirlər Kabinetinin 191 nömrəli qərarına əsasən ƏMDK öz veb səhifəsində 6 elektron xidməti təmin etmək tapşırılsa da, qurum öz elektron xidmət portalında 31 elekton xidmət təklif edir.

Lakin Nazirlər Kabinetinin qərarında əks olunmuş 1 elektron xidmət (Daşınmaz əmlak obyektləri barədə kadastr məlumatlarının hazırlanması və kadastr xidmətlərinin göstərilməsi üçün elektron müraciətlər) qurumun rəsmi elektron səhifəsində təmin edilməyib.

Sırf fərdi evlərin qeydiyyatı ilə bağlı isə 11 elektron xidmət göstərilir. Bunlardan 4-ü informativ və 7-si isə interaktivdir. 4 informativ elektron xidmət tam avtomatlaşmış şəkildə fəaliyyət göstərir və bu xidmətlərdən istifadə edərək xidmət haqları, borc məbləğləri, sənədin icraatı və s. barədə məlumat almaq mümkündür. Yerdə qalan 7 interaktiv xidmətdən 5-i üzrə elektron müraciət etmək mümkündür.

Daha sonra ƏMDK-nın nümayəndəsi Elşad Məmmədov hüquqi ünvanla, fiziki ünvanda olan uyğunsuzluğun hökumət üçün müəyyən problemlər yaratdığını qeyd edərək bu sahədə olan problemlər və yaranan suallar barədə 148 qaynar xəttinə müraciət etmək lazım olduğunu xatırlatdı.

Sevinc Çəltikova