TƏHLÜKƏSİZLİK

Onlarla ölkənin nümayəndələri bu həftə sonu Hanoyda qlobal iqtisadiyyata hər il trilyonlarla dollara başa gələn cinayətlərlə mübarizə məqsədi daşıyan BMT-nin kibercinayətkarlıq paktını imzalayacaq.

Xeberler.az “Reuters”ə istinadən məlumat verir ki, 40 ölkə tərəfindən ratifikasiya edildikdən sonra qüvvəyə minəcək sənəd Birləşmiş Millətlər Təşkilatının kibercinayətkarlığa qarşı reaksiyasını sürətləndirəcək və onun effektivliyini artıracaq.

İctimai fəallar, böyük texnoloji şirkətlər və BMT-nin İnsan Hüquqları üzrə Ali Komissarlığı cinayətlə bağlı qeyri-müəyyən ifadələrə görə potensial sui-istifadələr barədə xəbərdarlıq ediblər. Bəziləri bu ifadələrin qeyri-qanuni fəaliyyətin qarşısını almaq əvəzinə, onu asanlaşdıracağını iddia edirlər.

BMT kibercinayətkarlığın qlobal iqtisadiyyata hər il trilyonlarla dollara başa gəldiyinə dair təxminlərə istinad edərək bildirib ki, bu sənəd “fişinq” və “ransomware” proqramlarından tutmuş onlayn insan alveri və nifrət ritorikasına qədər genişspektrli cinayətləri əhatə edir.

“Access Now” hüquq müdafiə təşkilatının nümayəndəsi Raman Cit Sinqx Çimanın sözlərinə görə, imzalanacaq pakt hökumətlər tərəfindən axtarışa verilən şəxslərin ekstradisiyasını asanlaşdıra bilər.

“Vyetnamda kritik infrastruktur və iri korporasiyaları hədəf alan kiberhücumların artdığını görürük” -deyə İctimai Təhlükəsizlik Nazirliyinin kibertəhlükəsizlik departamentinin rəhbəri Le Suan Min bu ay keçirdiyi mətbuat konfransında bəyan edib. O, həmçinin daha sıx beynəlxalq əməkdaşlığın cinayətkarları üzə çıxarmağa kömək edə biləcəyini qeyd edib.