PROQRAMLAR

İqtisadi İslahatların Təhlili və Kommunikasiya Mərkəzi Birləşmiş Ərəb Əmirliklərində fəaliyyət göstərən International Business Magazine tərəfindən təşkil olunan “International Business Magazine Awards 2026” müsabiqəsində iki nüfuzlu mükafata layiq görülüb.

Xeberler.az məlumat verir ki, Mərkəz “National Think Tank Excellence Award – Azerbaijan 2026” və “Best Research Institution Supporting National Reforms – Azerbaijan 2026” kateqoriyaları üzrə qalib elan olunub.

Qeyd edilir ki, bu mükafatlar Mərkəzin ölkədə həyata keçirilən struktur və institusional iqtisadi islahatlara elmi-analitik dəstək göstərməsi, dövlət proqramlarının monitorinq və qiymətləndirilməsi mexanizmlərinin təkmilləşdirilməsi, məlumat əsaslı qərarvermə sistemlərinin tətbiqi və strateji idarəetmə sahəsində innovativ yanaşmaların formalaşdırılması istiqamətində gördüyü fəaliyyətin beynəlxalq səviyyədə tanınmasının göstəricisidir.

“National Think Tank Excellence Award” mükafatı Mərkəzin analitik potensialının, tədqiqat keyfiyyətinin və dövlət qərarlarının formalaşdırılmasında institusional rolunun yüksək qiymətləndirildiyini təsdiqləyir.

“Best Research Institution Supporting National Reforms” kateqoriyası üzrə qalibiyyət isə Mərkəzin iqtisadi, sosial və institusional islahatlara elmi əsaslı töhfə verməsi, strateji sənədlərin icrasının qiymətləndirilməsi və rəqəmsal monitorinq platformalarının tətbiqi sahəsində fəaliyyətinin beynəlxalq ekspertlər tərəfindən müsbət qiymətləndirildiyini əks etdirir.

Müsabiqədə müxtəlif ölkələrdən dövlət qurumları, tədqiqat institutları və beynəlxalq təşkilatlar da mükafatlandırılıb ki, bu da Mərkəzin qlobal analitik mühitdə rəqabətqabiliyyətli mövqeyə malik olduğunu göstərir.

Bildirilib ki, bu uğur dövlət idarəçiliyində şəffaflıq, hesabatlılıq və rəqəmsal transformasiya prinsiplərinin tətbiqinin beynəlxalq səviyyədə tanınmasının bariz nümunəsidir.

Qeyd edək ki, İqtisadi İslahatların Təhlili və Kommunikasiya Mərkəzi Prezident İlham Əliyev tərəfindən 2016-cı il 20 aprel tarixli Fərmanla yaradılıb və ölkədə strateji sənədlərin icrasının monitorinqi və qiymətləndirilməsini həyata keçirir.