PROQRAMLAR

İqtisadi İslahatların Təhlili və Kommunikasiya Mərkəzi (İİTKM) Sinqapurda fəaliyyət göstərən beynəlxalq media qurumu “Gazet International” tərəfindən təşkil olunan “Gazet International Awards 2026” beynəlxalq müsabiqəsində iki mükafata layiq görülüb.

Xeberler.az məlumat verir ki, mərkəz “Süni intellekt əsaslı dövlət sektoru innovasiyalarında liderlik” (Leadership in AI-Driven Public Sector Innovation) və “Ağıllı monitorinq və qiymətləndirmə sahəsində mükəmməllik” (Excellence in Smart Monitoring and Evaluation) nominasiyalarının qalibi elan edilib.

Məlumata görə, “Süni intellekt əsaslı dövlət sektoru innovasiyalarında liderlik” nominasiyası dövlət idarəçiliyində innovativ texnologiyaların tətbiqi və süni intellekt əsaslı həllərin inkişaf etdirilməsi sahəsində fərqlənən qurumların fəaliyyətini qiymətləndirir. “Ağıllı monitorinq və qiymətləndirmə sahəsində mükəmməllik” mükafatı isə monitorinq və qiymətləndirmə proseslərində rəqəmsal texnologiyaların, ağıllı analitika sistemlərinin və nəticəyönümlü idarəetmə alətlərinin səmərəli tətbiqinə görə təqdim olunur.

Müsabiqədə müxtəlif ölkələrdən dövlət qurumları, maliyyə institutları, texnologiya şirkətləri, innovasiya mərkəzləri və beynəlxalq təşkilatlar iştirak ediblər.

İİTKM-nin innovativ monitorinq və qiymətləndirmə mexanizmlərinin formalaşdırılması, dövlət idarəçiliyində süni intellekt texnologiyalarının tətbiqi və məlumat əsaslı qərarvermə sistemlərinin inkişaf etdirilməsi istiqamətində həyata keçirdiyi fəaliyyət mükafatların qazanılmasında mühüm rol oynayıb.

Qeyd olunub ki, Mərkəzin fəaliyyəti Azərbaycanda süni intellekt texnologiyalarının dövlət idarəçiliyində tətbiqinin genişləndirilməsi ilə bağlı strateji prioritetlərlə uzlaşır. Bu çərçivədə İİTKM tərəfindən yaradılmış monitorinq və qiymətləndirmə modeli dövlət proqramlarının icrasına nəzarət, performansın ölçülməsi və məlumat əsaslı idarəetmə sisteminin inkişafı baxımından qabaqcıl institusional təcrübələrdən biri kimi qiymətləndirilir.