PROQRAMLAR

İqtisadi İslahatların Təhlili və Kommunikasiya Mərkəzi (İİTKM) Birləşmiş Ərəb Əmirliklərində yerləşən “World Business Outlook” beynəlxalq media qurumunun təşkil etdiyi “World Business Annual Awards 2025” müsabiqəsində “Texnologiya” nominasiyası üzrə qalib olub.

Xeberler.az bildirir ki, mərkəz bu nüfuzlu mükafata dövlət idarəetməsində rəqəmsal texnologiyaların geniş tətbiqi, innovativ platformaların yaradılması və nəticəyönlü idarəetmə yanaşmalarının həyata keçirilməsi istiqamətindəki uğurlarına görə layiq görülüb.

Mükafatın təqdim edilməsində əsas meyarlar sırasında İİTKM-in Nazirlər Kabinetinin tapşırığı ilə dövlət proqramlarının monitorinqi və qiymətləndirilməsi üçün funksional rəqəmsal platforma qurması, layihələrin idarəedilməsində süni intellekt, məlumat analitikası, coğrafi informasiya texnologiyaları, video-müşahidə sistemləri və digər qabaqcıl alətlərdən səmərəli istifadə etməsi göstərilib.

“Texnologiya” nominasiyasında müxtəlif ölkə və regionlardan həm dövlət, həm də özəl qurumlar iştirak edib. Bu isə İİTKM-in qlobal texnoloji idarəetmə sahəsində lider mövqeyə malik olduğunu təsdiqləyib.

Mərkəzin əldə etdiyi uğur, ölkəmizin rəqəmsal dövlətçilik sahəsində nailiyyətlərinin beynəlxalq səviyyədə tanındığını və Prezident İlham Əliyevin rəhbərliyi ilə həyata keçirilən iqtisadi islahatların, rəqəmsal transformasiya proseslərinin, planlaşdırma və büdcə icrasında şəffaflıq və effektivliyi artıran təşəbbüslərin yüksək qiymətləndirildiyini göstərir.

Hazırda İİTKM-in tətbiq etdiyi müasir idarəetmə modeli qlobal miqyasda nümunəvi, innovativ və dayanıqlı yanaşma kimi qəbul olunur.

Mənbə: https://worldbusinessoutlook.com/award-winners-2025/